Kular u Myntri, ban iarap kyrpang ia ki nongrep ha Bhoi

Nongpoh:Kan da long ka jingkmen kaba khraw na bynta ki nongrep ha Ri Bhoi, namar mynta ka sngi kata ha ka por ba u Bah Banteidor Lyngdoh, Myntri ka sorkar jylla u hiar sha Ri Bhoi, ki nongialam jong ki kynhun nongrep ha Ri Bhoi, ki la ioh ban pynsngew markhmat ia ki jingeh kaba la kynduh da ki nongrep.

Katei ka jing iakynduh hapdeng ki nongrep bad utei u Myntri Sorkar, ka la long hapoh ka District Library kaba don ha Nongpoh, ha kaba lyngba katei ka jing iakynduh, kaba la donlang da u Bah Mayrald Born Syiem, MLA ka Nongpoh, nangta ki ophisar kiba peit ia ki kam rep lem bad ki nongialam na ki seng Nongrep.

Lyngba katei ka jingiakynduh hapdeng ki nongrep bad Myntri, ki la don shibun ngut ki nongrep kiba la ioh ban pynsngew markhmat sha utei u Myntri, halor ka jingeh kaba ki iakynduh bad khamtam eh ha kaba kum kane ka por ba don ka Lockdown.

 Haba la iohsngew ia ki jingeh kaba la pyni da ki nongrep, u Myntri sorkar, u la jubab ba ka sorkar ka sngewthuh eh ia ka jingeh kaba la iakynduh da ki Nongrep bad halor kata ka sorkar ka la dep ban shimkhia, namar ka sngewthuh ba ki nongrep ki dei kiba donkam tam bad kiba lah ruh ban khot ba ki dei u Budlum jong ka ioh ka kot ha ka jylla bad ka Ri hi baroh kawei.

 Ka long ruh ka khubor kaba sngewtynnad na bynta ki nongrep bad kata ka long hadien ba la iohsngew ia ka sur na utei u Myntri sorkar, uba la ong ba ka sorkar ia mynta ka la wad jaka, na ka bynta ban tei ia ka iew kaba kyrpang na bynta ki Nongrep bad kaba la tip kum ka Agriculture Regulated Market, ia kaba ka sorkar ia mynta hi ka dang wad ia ka jaka kaba biang ban buh ia katei ka jaka.