Shillong 24 Risaw: Ar tylli ki shnat trei kam jong Ka Khasi Students’ Union (KSU) kata Ka KSU Mawlai Circle ba la ialam da u Samla Biangbor L. Paliar (President KSU Mawlai Circle) bad Samla Eddie Malngiang(General Secretary KSU Mawlai Circle) bad kiwei kiwei ki dkhot na ka Circle bad ka KSU NEHU Unit ba la ialam da u Samla Sandy Sohtun (President KSU NEHU Unit) bad Samla Shibaitlang Rymbai (Vice-President KSU NEHU Unit) bad kiwei kiwei ki dkhot na ka Unit, ha ka 24 tarik Risaw 2024, ki la leit ia kynduh bad ai da ka jingthoh ia u Bah Brightstarwell Marbaniang u ba long u MLA jong ka Mawlai konstitwensi ban kyntu bad kyrpad na ka bynta ban phah maramot noh ha ka PWD(Roads) iaka surok ha shi lynter ka lynti naduh na jingkieng Mawlai Kynton Massar ter ter shaduh ka Gate 5 jong ka skulbah NEHU.
Na ka liang ki dkhot jong ka KSU Mawlai circle & NEHU unit ki la pynsngew, ba ka jinglong jingman jong kane ka surok ka la jot rathai ha kaba la sakhi ha shilynter kaba buh jingma bad jingmynsaw ia ki nongshong shnong kiba iaid ba ieng ha kine ki bynta bad khamtam eh ia ki samla pule bad ki nongtrei jong skulbah NEHU.
Ha kine ki bnai ba la dep ki la don shibun ki jingjia bad jingujor halor ka jingtyngkhuh kali bad ka jingshah tynrah kali jong kiba iaid ba ieng ha shilynter katei ka surok bah bad ka ba la jia shah tyngkhuh ruh ia ki samla pule jong ka skulbah NEHU, kane ka buh jingma shikatdei eh ia ki ba iaid ba ieng na kane ka surok bad ym tang katta, hynrei ka ktah ruh ia ka jingshngain jong kiba pyndonkam ia kane ka surok.
Ha kane ja jingiakynduh ka seng na ka liang u MLA u la kular hakhmat ki dkhot jong ka seng ba un shimkhia, ban phah maramot noh mardor ia kane ka surok ha kine ki kyndiat sngi ki ban sa wan na ka bynta ka jingbit jingbiang jong ki samla pule bad baroh ki paidbah kiba ju pyndonkam ban iaid ban ieng lyngba kane ka surok.
Phi don ban ong eiei?