Kular U CEM ia U bah Sanbor, ban pynksan ia ka Ain shna iing

Shillong, 11 Nailar:
U bah Sanbor Shul lai MLA/MDC myn ta ka sngi u la leit ban ia kynduh ia u Chief Executive Member ka KHA DC u bah Pynshngain N Syiem ban leit pynkyn maw biang ia ka mat jingdawa kaba u la phah ha ka 7 tarik u naitung, 2015 bad kaba u la dawa ruh naduh u snem 2011, kata ban pyntreikam noh ia ka Ain shna iing ka KHADC ka building Bye-Laws bad ban pynsted noh ia katei ka kam, namar ba ki paidbah mynta ki la ia kynduh jingeh namar ka jingkyntur pud ka MUDA sha ki jaka ba hap hapoh ka jingpeit ka District Council.
Hadien ka jingiakynduh CEM, u bah Sanbor u la ong ba u CEM u la jubab ia u ba u la thaw bun ki komiti na bynta katei ka kam ban pyndep noh ia ka ain shna iing ka KHADC bad mynta u la ong ba ka kam ka la iaid shaid shaid shakhmat. U bah Sanbor u la ong ruh ba u CEM u la kular ha u ban pyndep kloi ia katei ka kam bad hadien ba la dep pynbit pynbiang nadong shadong bad hadien ba la dep pynmih hapoh ka Meghalaya Gazette u CEM un lum ia baroh ki MLA/MDC bad kumjuh ruh ki Khlieh Nongsynshar bad ha ka juh ka por katei ka kynhun kaba u CEM un lum kan leit ia kynduh ia ka sorkar ban ia kren na ka bynta ban pynksan ia ka ain shna iing ka KHADC ha ki jaka ba hap hapoh ka jingpeit jong ka.
Hadien kata u bah Sanbor u la ong ruh ba u CEM u la kular ban lum ia ka Dorbar Ri jong ki paidbah ka bri u Hynniewtrep bad ha katei ka Dorbar Ri ka ban sa long shen u la ong ba un pynbna ia ki paidbah ba la pyntreikam ia ka Ain shna iing ka KHADC kaba ki paidbah lyngba ki Dorbar Shnong ki lah ban wan shim jingbit na ka KHADC na ka bynta ban shna iing.