Nongpoh: Haba kren sha ki paidbah kiba la donlang ha ka sngi kaba la plie paidbah ia ka Pnahkyndeng ba kan long kum kawei ka jaka jngohkai pyrthei kaba don ha shnong Pahamskhen ha Ri Bhoi, u Bah Sanbor Shulai, u la ai ka jingkular sha ki paidbah, kumjuh ruh sha ki nongialam Raid bad shnong, ba un iakhun tyngeh ban un pynioh ia ka surok ba bha, na ka bynta ban leit sha katei ka jaka jngohkai pyrthei.
La sngewthuh ba ka nongrim kaba la pynlong ia u Bah Sanbor Shullai, Chairman ka Meghalaya Tourism Development Corporation (MTDC), ba un kular ban pynioh surok ia katei ka jaka, ka dei hadien ba u la iohi ba katei ka jaka, ka donkam eh ban ioh surok bad lada ioh surok, katei ka Pnahkyndeng, kan sa kylla long shisha kum kawei na ki jaka jngohkai pyrthei kaba paw eh ym tang ha Ri Bhoi, hynrei ha ka jylla hi baroh kawei.
Haba kular ban pynioh surok bha ia katei ka jaka, u Bah Sanbor Shulai, u da kren danda ruh pyrshah ia ka sorkar jylla, da kaba ong ba ka sorkar Meghalaya kam don pisa bad kam lah ruh ban iarap pynioh surok na ka bynta ban leit sha katei ka jaka, hynrei ma u jait ba u dei u MLA na ka Party BJP, un pan jingiarap beit na sorkar pdeng bad thikna katei ka jaka kan sa ioh surok bad katei ka Pnanhkyndeng, kan sa long shisha kum kawei na ki jaka jngohkai pyrthei ba paw, ha kaba baroh ki briew kin sa kwah ban leit sha katei ka jaka.
U Bah Sanbor Shulai, u la ong ruh ba ynda u la kham kylluid por, un sa ialam ia ki nongpeit nongkhmieh jong katei ka jaka jngohkai pyrthei sha Delhi, na ka bynta ban iakren beit markhmat bad u Myntri ka sorkar pdeng bad uba deipeit ha ki kam jngohkai pyrthei, dei hangta ba katei ka jaka kan sa ioh beit ia ka surok ba bha na ka bynta ban leit sha katei ka jaka jngohkai pythei kaba dang shu plie bad kaba ban sa pawnam shen.
Phi don ban ong eiei?