Shillong: U symbud myntri rangbah ka jylla u bah Prestone Tynsong ula kular ban peit ba ka jingshalan masi sha Bangladesh, kan sangeh noh hadien ba ka la ktah jur ia ka kam jong ki nongshoh doh masi ha kane ka jylla.
Haba pynthikna ia kane, u president ka seng Khasi Jaintia Butchers Welfare Association (KJBWA), u bah Generous Warlarpih u la ong, “Ngi la iakren ban iapyrkhat lem ia ka jingeh ki nongshoh doh, ka jingjur palat ka jngshalan masi sha Bangladesh, ka la ktah jur ia ngi”.
Haba pynpaw ba ka jingsngew tynnad ia ka jingkular u bah Prestone ban peit ia ka jingiaid ki kali kit masi ha surok, u bah Generous u la ong, “U Symbud myntri rangbah ka jylla u ong ban shim khia ia kane ban khang lad ban shalan masi sha Bangladesh”.
U bah Generous ula bynrap, “Ha kine ki sngi ban wan, yn sa lah ban leh eiei ban pynsangeh ia ka jingshalan masi sha Bangladesh. Ia ka kam kaba iadei ha lynti ne ka surok yn shim khia ka sorkar”.
Ha kajuh ka por, u bah Generous u la ong ba ka seng kan iashong jingialang lashai ban iakren pynbeit wat ban sdang ban die doh masi noh hadien ba la sangeh shi taiew tam mynta.
“Na ka liang jong ngi, ngin iapynbeit ia ka kam iew ban iashong lashai bad ym slem ban sa plie noh ia ki dukan”, u la ong.
Lah ban kdew ba ka KJBWA ka la sangeh ban shohdoh masi naduh ka 7 tarik mynta u bnai ban pyrshah ia ka jingshalan masi sha Bangladesh.
Phi don ban ong eiei?