Kular ka AMKA, ban iakren ia ki Karbi, ban nym pynthut Khasi

Nongpoh, 27 Jymmang:
Ka Khasi Student Union (KSU) North Khasi Hills ka la kynduh ia ki nongialam jong ka All Meghalaya Karbi Association (AMKA) ha Nongpoh ban iakren sngewthuh jingmut halor ka jingshah thombor ki Khasi sah ha khappud ka Assam ha ki lehnoh Karbi People Liberation Tigers (KPLT). Ka AMKA ka la kular ha ka jingialang ba kan leit sha Karbi Anglong ban iakren ia ki Karbai ba kim dei ban pynthut ia ki Khasi ba sah ha katei ka thain.
Ha ka jingiakynduh ba long hynne ka sngi Hatmajai hapdeng kine ki arliang mamla la pynlong ha ka ophis treikam jong ka KSU ha Nongpoh, la don u President ka KSU, North Khasi Hills District Samla Ferdynald K Kharkamni, samla Vincent Makri, Secretary lem bad kiwei ki dkhot bad ka liang ka AMKA hapoh ka jingialam jong u president Bah B.S Teron, Bah Moris Ingti, secretary bad u Adviser Bah O.L Teron bad kiwei ki nongialam ban iakren halor ka jingshah thombor ki Khasi ha Block-II.
Hadien ba la wai ka jingialang, u Bah Teron u la iathuh, ka seng ka dap da ka jingsngewkhia jur halor ki kam thombor jong ki lehnoh Karbi pyrshah ia ki Khasi Khara kiba shong basah ha Block II. “Ka AMKA ka ieng shkem ba kam kwah ban wanrah ia ka jingsngewpher jaidbynriew hapdeng ki Khasi bad ki Karbi bad ka pynrem jur ia kum kane ka jingpynibor bad ka jingthombor jong ka lehnoh KPLT pyrshah ia ki Khasi ha Block II,”, u la ong.
Ka AMKA kan nym ai lad ia kum kine ki jingjia ba kum kitei ki kynhun lehnoh kaikhlaw na Karbi Anglong (Assam) kin nang pynjur ha kane ka jylla bad khamtam ban pynlong langknia ia ki jaidbynriew Khasi kiba shong basah ha ki khappud jong ka Meghalaya bad ka Assam la ong u bah Teron.
U president ka KSU, NKHD u samla Kharkamni, u la pynpaw ia ka jingsngewkmen ia ki nongialam jong ka AMKA halor ka jingshimkhia jong ki ban wan mih sha ka miej jingiakren na ka bynta ban pynbeit bad ia mir jingmut halor kitei ki kam thombor jong ka kynhun lehnoh na Karbi pyrshah ia ki Khasi Khara kiba shong basah ha Block II.
Ki nongialam jong ka AMKA ki la shim ruh ia ka rai ban pynbeit ruh ia ka jingiakynduh lang ka ban sa long shen bad kiwei kiwei ki sengbhalang na Karbi Anglong na ka bynta ban iakren sngewthuh bad ruh ban wad ia ki lad ki lynti kumno ban wanrah ia ka jingsngewthuh jingmut lang hapdeng ki jaidbynriew Karbi bad ki Khasi bad khamtam eh ban pynbor ia ki kynhun kaikhlaw na Karbi Anglong ba kin sangeh noh mardor ia ki kam thombor bad dawa pisa na ki paradoh parasnam kiba shong basah ha ki khappud, la ong u Bah Kharkamni.