Kular iarap pisa ka sokar ban shna ia ki hall pyni phlim Khasi Ha ka sngi rakhe dap 4 snem ka MeFilMA

Shillong, 23 Jylliew:
Ka Meghalaya Film Maker’s Association (MefilMA), ka la rakhe ia ka jingdap 4 snem ha ka 18 tarik mynta u bnai ha Shillong.
Nalor ki nongpyn mih phlim, director, ki nongiashim bynta, ki nongrim phlim bad kiwei kiwei ki la wan ban iashim bynta ha kane ka sngi.
Shuh shuh na ka liang jong ka MeFilMA ha kane ka sngi ka la leh burom da kaba ai certificate ia ki ar tylli ki phlim kiba la pynmih nyngkong, ka phlim Khasi ka dei ka Synjuk Ka Ri Ki Laiphew Syiem bad kawei pat ka dei ka Dasaman ha ka phlim Jaintia.
Na ka liang jong u kongsan ha kane ka sngi u Zenith Sangma uba la wan ha ka jaka jong u Myntri Rangbah u Dr. Mukul Sangma u la pyn paw ia ka jingsngew kmen ban ioh iadon bynta ha kane ka jingrakhe dap snem jong ka seng. U la iathuh ba ka sorkar ka shimkhia na ka bynta ban kyntiew ia ki kam pynmih phlim ha ka jylla bad u la ai mynsiem ruh ia ki briew ba kin shna ia ki hall ban pyni phlim bad u la ong ba ka sokrar kan iarap pisa subsidy kumba 30 haduh 40 percent.
Na ka liang jong u President jong ka Meghalaya Film Maker’s Association u bah Commander Shangpliang haba kren ha kane ka sngi u la pynpaw ia ka jingsngewsih halor ka jing leh piracy ia ki phlim khasi bad u la khot ia ka jingiatreilang ban rat dyngkhong ia ka piracy.
U la kyntu ia ka sorkar ba ka dei ban ai jingiarap bai bam ia ki samla kiba kwah ban pule pyntbit ha ki kam ak phlim bad kumjuh ruh ban iarap pisa subsidy ia ki phlim khasi. Bad la ban jur ia ka sorkar ba ka dei ban iarap na ka bynta ban shna ia ki hall ha baroh ki District Head quarter ha ka jylla.
U la kyrpad ruh ia ka sorkar ba kan shna ia ka Film Development corporation bad kumjuh ruh la kyntu ia ka sorkar ba kan thied ia ki tiar shna phlim bad u la pynpaw ruh ia ka jingsngewsarong halor ka jingioh khusnam jong ka phlim khasi Ri.
Ha kane ka sngi pynshongshit da ki prokram bapher bapher kynthup ka jingshad, ki jingrwai bad ka jinglehdrama na ki actor actress jong ki phlim khasi.
Zenith katba u dang sam khusnam iaka phlim jaintia banyngkong ka ‘Dasman’ U bah Commander Shangpliang President ka MeFilMA katba u dang ai jingkren.