Kular ban pyllait Aadhaar ha Mawryngkneng

Shillong,18 Nailar:
Mynta ka sngi ka Dorbar Shnong jong ka shnong Mawryngkneng hapoh ka jinglam jong u Sordar jong ka u bah Peter J Lawai ka la leit ban ia kynduh ia u Commissioner and Secretary Education bad u Director of higher and Technical School Education ban ia kren halor ka jingpan ka tnad pule ia u Aadhaar Nombar na ki samla pule kiba aplai ia ka Scholarship.
Ka Dorbar Shnong ka la phah ruh da ka jingthoh kaba la soi kyrteng haduh 17 ngut ki riew rangbah bad ha katei ka jingthoh ki la pan jingshai balei ba ka tnad pule ka pynbor ia ki samla pule da kaba pynmih ia hukum ba ki dei ban don ia u Aadhaar nombar na ka bynta ban ioh Scholarship. Ki la kdew ruh ha ka jingthoh ba katkum ka jingtip jong ki, ki la ong ba ka Supreme Court ka la hukum ba ym dei ban pynbor iano iano ruh ban leh ia u Aadhaar Nombar lait noh lada ki paidbah ki mon hi, kumta ki la kyrpad ba dei ban pyllait ia ki samla pule na katei ka jingpan Aadhaar nombar.Haba ia kren bad u bah Peter J Lawai u la ong ba u Director u Ram Singh ha ka jingiakynduh kaba markhmat u la kular ia ki ba un dang pynjlan shuh shuh ia ka tarik na ka bynta ki samla pule ba kin thep ia ki phom Scholarship jong ki bad u la ong ba u la kular ruh ba yn ym pan Aadhaar nombar shuh na ki samla pule.