Shillong, 12 K’Lyngkot: Ka UDP ka seng riewlum kaba heh tam ha kane ka jylla ka la don ka jingiakren iathir kumno ban ioh ia u President basuk iabeit lang khlem da don kano kano ka jing iaknieh ne iatynjuh bor.
U Working President ka UDP u Dr Jemino Mawthoh u la kubur ba ka la don ka jingiakren ha ka party ban pynkhlain ia ka party wat naduh ka kam President hynrei ka dei ban long da ka lynti kaba iasuk iabeit lang khlem don kano kano ka jingiaknieh.
“Ngi la ngiah la thait ia ka jingiaknieh bor iakawang ktieh namar ba
kam nym poi shaei shaei ruh hynrei kan wanrah pynban tang ia ka jingiapait iapra”, la ong u Working President ka UDP u Dr Mawthoh haba iakren bad u Rupang ha kane ka sngi Hatmajai.
Haba kylli hato u don ne em ka jingthmu ban shimti kam President ka UDP kumba la iakren ki paidbah namar ba u dei uwei na ki nongialam ba kham khuid, u Dr Mawthoh u la ong, “Kam don kano kano ka jingthmu ban iaknieh ia ka kam President, kano kano ka kam kaba ka party ka bynshet ka dei ka jingiatreilang lyngba ka jingiasngewthuh jingmut lang”.
“Ngi kwah ba kum ka party kaba heh tam ha kane ka jylla, ka dei ban long kaba iatylli kaba iasngewthuh jingmut lada shim president mano manor uh”, la ong biang.
Katkum ka jingong u Dr Mawthoh, la dep sakhi la dep iohi ia ka jingiakhih iaknieh bor ban long heh ha kano kano ka party kam shym la poi shano shano ruh hynrei tang ka jingjot. U la ong kum ka jaitbynriew ka donkam ia ka jingiatylli bad ka la thait ban don ka jingiaknieh bor namar ka pynsynjor ia ka jaitbynriew.
“Kumba ka paw, ki paidbah ka jylla ki la ap bad peit khmih lynti ia ka UDP kum kawei ka party kaba heh tam ha kane ka jylla ba kan thaw thymmai ban pynkhlain ban shakri ia ka jylla. Kumba ka paw ka dak ka shin, ki paidbah ka jylla ki la ngiah ia ka Congress kaba synshar ha kane ka jylla ia ki kam jongka bad ki kwah ban phaikhmat sha kawei ka party ha kane ka ri Khasi bad Jaintia bad ruh sha Garo Hills”, la ong
u Working President ka UDP uba dei ruh u MLA na Nongthymmai.
Katkum ka khubor ba la iohlum, ka UDP ka la don mynta ha ka jingpynkhreh ban jied President lada ioh da uba thymmai bad kiba paw kyrteng napoh napoh kiba don ha ka thup ban long President ki kynthup ia lai ngut ki Working President Bah Bindo M Lanong, Bah Paul Lyngdoh bad u Dr Jemino Mawthoh.
Phi don ban ong eiei?