Ktha khlieh ka PHE ba kwah paip rim ki shnong ha sor

Shillong, 7 Nailar:
Ka Public Health Engineering (PHE) ka la iakynduh ia ka jingeh ban buh ia ki paip (pipe) um thymmai ba la mang na ka Greater Shillong Water Supply Scheme (GWSS) namar ka jingpyrshah ki shnong kiba don ha sor. Bun ki dong ha sor ki dang kwah ban buh da ki paip rim namar ki sngew hun ia ka jingsam um da ki paip rim.
Ka jingthmu ban pyniaid ia ki paip hapoh khyndew ka la shem jingeh namar ka jingpyr shah ki shnong. Ki nong shong shnong jong ki dong ki sngew biang ia ki paip kiba pyniaid mynta ban sam um. Kim treh ban thep da u paip thymmai GI ban bujli ia u paip DI, la ong uwei u heh sorkar mynta ka sngi Balang.
Ka long ka kam ka ba eh ia ka tnad ba kan iakren ban pynngeit ia ka dorkar shnong ban shah ban thep da ki paip thymmai.
“Ka jingiakren jong ka tnad bad ki katto katne ki Dorbar Shnong ka la lah ban wanrah ia ka jingmyntoi, bad ngin bteng ia kane ka jingiakren bad kiwei ruh,namar ba ka sorkar ka thmu ban pynbha ia ka rukom sam um ha ka nongbah bad khap sor lyngba kane ka skhim thymmai”, la ong u heh sorkar bym kwah pynpaw kyrteng.
Nalor ki jingeh ban pynngeit ia ki dorbar shnong, u la ong ba kane ka projek ka lah ban pynslem shuh ban pyndep namar ba ka por treikam ka long kaba lyngkot ha kane ka jylla.
“La buh por biang ban pyndep ia kane ka projek ha ka bynta ba nyngkong jong u snem 2014. Ngin don sa hynriew ne hynniew bnai ban pyndep ia ka jingtrei”, u la ong shuh shuh.
Ha ka jingshisha ka sorkar ka la buh ban pyndep ha u Nailar mynshem snem, hynrei la pynjlan biang namar ka jingwan ka elekshon MLA ha kane ka jylla.
“Hynrei kane ka jingpynslem kan ym ktah ia ka dor. Ngi la shim ia ki lad ki lynti ban pynthikna ba kan ym don satia ka jingkiew dor tang namar ka jingpynslem”, u la ong.
U la ong ba ia kine ki paip thymmai la thep ha khyndew ha baroh ki mynta jong ka nongbah. “Ka Stage III jong ka GSWSS kan ai um 135 litre shi khlieh ha ka shi sngi na ka bynta u nongshong shnong 5.12 lak ngut,” la ong u heh sorkar bad bynrap ba ka Stage I bad II ba mynta ka ai um tang 85 litre shi khlieh shi sngi.