Ktah shiliang ka pakhang shnong ka HNLC

Shillong, 27 ’lyngkot:
Ka pakhang shnong kaba 24 kynta ka seng kiengatiar ka HNLC ka la ktah shiliang shiphiah ha Khasi bad Jaintia Hills.
Ka jingpakhang shnong ka la treikam naduh ka 6 baje janmiet ka sngi u Blei haduh a 6 baje janmiet ka sngi Lah Sngi u Blei.
Hynrei ha kane ka kynta pakhang shnong, la iohi ba ki dukan ki plie ha ki thain Polo, Laitum khrah bad Laban wat hapdeng ki kynta jong ka pakhang shnong. Ha kiwei ki bynta jong ka nongbah pat, la iohi ba ki dukan ki plie wat haduh ka por mynmiet ruh ha kasngi u Blei lait noh tang ka jingkhang ki iew ki hat.
Ym kum ha kiwei ki por mynshwa, ka jing rakhe ia ka sngi Republic Day ha kane ka jylla ka la long kumba ju long khlem kano kano ka jingma ne ka jingpynthut.
Ha kane ka sngi Republic Day, ki seng lehnoh bapher bapher na kane ka thain shatei lammihngi ka India ruh ki la pakhang shnong ban pyrshah ia kane ka sngi.
Ia kane ka pakhang shnong ka HNLC la ju pynpaw pyrshah ruh da ki paidbah ha ki sngi ba la deo ruh.
Ka sorkar jylla, ha kawei ka liang ka la pynbiang ia ki bor pahara ha kylleng ki jaka khamtam ha ka nongbah Shillong ha kaba la pynlong ia ka jingrakhe ia kane ka sngi kaba shongkun bad kaba shongshit ha madan Polo.
Ha kawei ka liang, ka HNLC ka la ong ba ka pakhang shnong ka long kaba jop ha baroh kawei ka Khasi bad Jaintia Hills.
Ha ka jingpynlait khubor ha ka sngi Saitjain, u Publicity Secretary ka HNLC u Sainkupar Nongtraw u la pynshai ba ka seng kam shym la pynwit ia ka jingleh niam da kaba ong ba ka jinglehniam Saraswati puja kaba long ha ka 26 tarik ka dei ka jingjia ba tyngkhuh bad ka Republic Day.