Ktah kti ki pulit, ia uba don ha ka jingshitom, ong ka Dorbar Smit Don ka jingsuba kaba jur, da ki nongshong shnong ia kane ka long iing

Shillong, 20 Nailar:
Ka dorbar Shnong jong ka Smit Pyllun, kaba iakynduh mynta ka sngi, ka pynshai ba kam long kaba shisha, ba ki paidbah jong ka Shnong Smit, ki long kiba thrang snam, kumba la mih ha ki kotkhu bor ha kine ki sngi. La ong shuh shuh, ba halor katei ka jingjia, ka don ka jing bitar bad ka jingsngew syier jong ki paidbah nongshong shnong, namar ka jingshah pyniap khah khah jong ki nongshong shnong ha kajuh ka rukom. “Ka la don ruh ka jingsuba kaba jur, da kiba bun ki nongshong shnong ia kane ka longing” ong ka kyrwoh khubor, ba la soi da U Sordar bad U General Secretery ka Dorbar Shnong Smit Pyllun mynta ka sngi.
La ong pat ba kam shym la don ka jingpyrshang ban thombor lane ban shim ia ka jingim jongki, khlem da don ki sakhi ki sabut kiba biang. Ka khubor, kaba la mih na u samla Lambha Nongrum, uba la shah shoh bad pynmynsaw, da ka jingthmu ban shim ia ka jingim jong u, da uta U Pasan jong u, ka la pynkhihwin ia ki paidbah bad la ong shuh, ba ban pyniaryngkat ia kane ka jingjia bad kiwei pat ki jingjia, ha kiwei ki shnong, ka long ka bym don nongrim satia. “Ym dei u paidbah Smit, uba leit sei jubor ia ki na iing, hynrei dei ma ki hi, kiba la leit sha iing jong une u khynnah uba la mynsaw. Mangi ruh kum ki nongialam shnong, ngim lah ban shemphang ia ka jingmut bad ia ka jingthmu jong ki”.
Ka Executive Committee jong ka Smit, ka pynrem ia ka jingleh jong ki pulit, ha kaba ki la leit ban kem briew, khlem da kynjoh ktien bad pyntip ia ki nongialam Shnong. Kane ka pynpaw ba ki pulit kim burom ia ka jingtyrwa jong ka shnong ban iatreilang, ha kaba iadei bad kane ka kam. Ka Executive Committee, ka pynrem ruh ia ka jingktah kti ia U bah Michael Thangkhiew, uba don hapdeng ka jingshitom bad ka jingshah sumar.
Ka komiti ka kwah ruh ban pynshai ba ka daw bah, kaba la pynlong ia ka bor shnong Smit Pyllun, ba kam lah ban teh lakam ia kane ka jingjia, ka dei namar ba kane ka jingjia ba sngewsih, ka dei ha ka sngi iew Umni, ha kaba kiba bun bah ki paidbah jong kiwei pat ki shnong, ki ia don lang hapdeng u paidbah, ym shuh tang u paidbah ka Shnong Smit.
“Khatduh khatwai ka komiti ka pynpaw ba kam mynjur ia ki kam pyniap briew hapoh u pud u sam jong ka shnong bad ka pynrem jur ia ki nongshim kabu, ha kaba iadei bad kane ka jingjia” pynkut ka kyrwoh na U bah KM Syiem bad U bah GL Nongbri jong ka Dorbar Shnong Smit.