Ktah ka jinghiran ia ka leh niam Puja

Shillong, 09 Risaw:
Ka jingleh niam Durga Puja jong ki riew ngeit Hindu kala sdang mynta ka sngi hynrei ha kane ka snem, katkum ka jingiakren bad ki malik nongkhaii, la sngewthuh ba ka jinglehniam ka lah ban kham rit namar ba ki briew ki hiran ha ka ioh ka kot ha kane ka jylla namar ka jingkhang dewiong, bad kiwei ki daw.
Haba iakren bad ki katto katne ki dkhar ha nongbah, ki la ong ba ka jingleh niam ka lah ban ktah namar ba ki briew ki don mynta hapdeng ka jinghiran pisa namar ki daw kum ka jingkhang dewiong ha kine ki snem, ka jinghiar ka ioh ka kot, kaba ma ki, ruh ka ktah lang ia ka kamai jongki.
Hynrei, watla katta, ki la ong ba ka mynsiem lehniam Puja kan iaid beit bad kan rhem ban pynphriang ia ka khubor jingsuk, jinglong paralok ia baroh.
Na ka bynta kane ka jingleh niam, ki bor sorkar ki la pynjur bha ia ka jingpahara ha man ki jaka lehniam ne puja pandal ioh don kano kano ka jingeh. Ki pulit kila buh CCTV ruh ha man kine ki jaka.
Ha kane ka nongbah Shillong, la iohi ha kylleng ki jaka ba don ki Pandal ki paidbah kila iai tuid ban leit ban pyndep ia la ka jong ka niam ka rukom kaba dei ban leh. Kane ka jingleh niam kan long saw sngi lynter haduh ka sngi ban noh blei.
Kane ka jinglehniam Durga Puja, kala long ruh ka jingleh kmen ha kaba baroh ki jaid niam ki lah ban ialeit ia wan ban leit jngoh ia ki pandal na kawei pat ka pandal. Ka dei ruh ka por ha ka ban ialeit jngoh ia ki paralok parajor ban ia ai khublei “Durga Puja ba suk ba kmen”.
Ka jingleh niam puja kam dei tang ia ki khar Hindu, hynrei kiba bun ki jaka la pynlong ia kane ka jingleh niam ha kaba kiwei ruh ki bym dei Hindu, ki la iashim bynta lang.