Kren thurmur u Addl. CS, ong Bah Sanbor

Shillong, 06 Nailar:
U MLA ka South Shillong u Bah Sanbor Shullai u la ong ba u Additional Chief Secretary ba peit ia ka tnaad sor u Prashant Naik u la kren thurmur  khlem da tip ia ki kyndon ain jong ka Meghalaya Urban Development Aurhtoirty (MU DA) kumba la paw ha ki lad pathai khubor.
“Ka jingkren jong u Naik ba ka ain ka MUDA ka treikam ha baroh ka Shillong Master Plan bad ka MUDA kam dei ka nongwei, ka la phalang ha ka jing mut jong nga ba u Naik um pule bha ia ka ain Megha laya Town & Country Planning Act, 1973”, la ong u Bah Shullai.
U Bah Shullai u la ong ba katkum ka jingkren jong u Naik, um tip ia ka Section 1 ka Meghalaya Town& Country planning Act, 1973 kaba la batai ba kane kam nym treikam satia ha ki jaka ba hap ha pud u sam kaDistrict council lada ka Council kam pdiang ia ka.
“Hato u Naik u lah ban ai ia ka jingthoh ba ka District Council ka la pdiang ia ka Meghalaya Town & Country planning Act, 1973 bad lada um lah, u dei ban sangeh shi syndon ban kren lamler”, la ong u Bah Shullai ha ka jingpynlait khubor hynne ka sngi Palei.
Halor ka jingong u Naik ba ka MUDA kam dei ka nongwei, u Bah Shullai u la ong ba ka MUDA ka dei ka nongwei namar ba ka jaka jongka ka hap tang ha European Ward hynrei ka leit skud sha jaka jong ka district council.
Na ka liang u Bah Shullai u la kyntu ia u CEM ka KHADC ban lum ia ka jingialang jong baroh ki seng sain pyrthei ban iakren ia kane ka kam khnang ban khang lad ia ka jingskud jaka ka MUDA sha jaka jong ka Council.