U Donald Trump, President jong ka America, u kam hynnin ka sngi ba ki shipai jong katei ka Ri, ki la lah ban pynjot thiaw ia ki ktem jong ki ehrang ISIS ha Syria bad u da pyni khyllew ruh ia ka map jong katei ka Ri, kaba pyni ia ki jingshisha ba ki ehrang ISIS, ki la jah rngai na katei ka Ri.
Ka map kaba ruid dak saw, kaba pyni ia ka jingdon ki ISIS bad kaba rong lieh, kaba pyni ba kim don shuh.
Haba pyni ia katei ka map, ula ong “Kane ka dei ka dur jong ki jaka ba ki don ki ISIS, ha ka sngi ialeh elekshon bad mynta ka long pat kumne” U Trump, ula ong ha ka jingiakren ha West Palm Beach, Florida, ha kaba u pyni ia ki dur kiba don jingiapher ha ki juh ki jaka. “Lada phi peit, kane ka dei ka dur jong ki ISIS bad mynta kane ka dei ka dur, kaba haduh hynnin ka miet” ula ong biang.
Ula ong ruh ia ki nongthoh khubor “Maphi shim kane ka map. Khublei bad sa pyntip sha ka pyrthei baroh kawei”.
Ki lad khubor ki iathuh ba ki ehrang ISIS, ha ki khyndiat sngi ba ladep, ki la rieh ha ki krem ki kroh ban lait na ka jingshah siat bad shah ther bom. Na ka liang jong ki shipai jong ka Syrian Democratic Forces (SDF), ki la ia khun tyngeh ia kitei ki ehrang ha ki bynta jong ka Baghouz, ha kaba la kyrshan ruh da liengsuin iapom jong ka America. La iathuh ba ki ISIS, ki la phet rieh bad shong ha ki krem kiba don ha syndah jong ka Wah Euphrates ha Baghouz, ban lait na katei ka jingshah ther ha ki shipai jong ka America.
Kat haduh mynta ka SDF, kam pat shym la pynbna ia ka jingjop ba pura, hynrei kan sa pynher ia ka lama jong ka jingjop, ynda haba ka la thikna ba kitei ki ehrang ki la jah duh na ki bynta jong ka Baghouz. La iathuh ba ki poiwir, kiba mih na katei ka nongbah, ki la nang tuid sha al-Hol bad haduh mynta ki don 72,000 ngut ki briew, ba kynthup ia 40,000ngut ki khynnah rit ha katei ka jaka sah ki poiwir bad kiba iap ha kitei ki jaka rieh, ki long 138ngut haduh mynta bad kiba bun na kitei ki dei ki khynnah rit bad ki khyllung.
Phi don ban ong eiei?