Kren khlemakor u myntri barim ka AP, ia ki kynthei ha madan Golf

Shillong, 5 Nailar:
U Myntri kampoh iing ka jylla Arunachal Pradesh u L Wanglet la shah kynnoh ba u la pyn donkam da ka tien khlem akor ia ki kyntei kiba ap pahara ha madan Shillong Golf Club.
“Ngi la ioh pdiang ia ka jingujor na ki kynthei ba ap pahara ha nga ba u Wanglet uba dei ruh u dkhot ka Shillong Club ba kren khlem akor”, la ong u president ka Shillong Golf Association u Bah AL Hek ha ka shithi sha u director ka Shillong Golf Course u R Shullai dang shen.U la ong ba u Wanglet uba dei ruh u convener ka Disciplinary Committee ka Shillong Club Limited u la shah kynnoh ba u pyndonkam da ki ktien khlem akor pyrshah ia ki nongiaid nongieng kiba iaid kai ha katei ka madan.
‘Ka long kaba sngewsih ba u dkhot ka klob un leh kumta. Ka long kaba shai ba u Wanglet um tip ia ki jinglong ka kolshor jong kane ka jylla khamtam ia ki kynthei. Kum kane ka jingleh ym lah satia ban pdiang ha kane ka imlamng sahlang”, la ong u Bah Hek.
Ha kajuh ka por, la iathuh ba utei u myntri sorkar barim ka jylla Arunachal Pradesh u donkti ban weng kam kumba 12 ngut ki kynthei kiba ap pahara ha katei ka madan.
Ha ka jingujor sha u Bah Hek, kawei ka kynthei nongpahara ka la kynnoh ba u Wanglet u la pyndonkam da ki ktien khlem akor kum, ‘ka pha ka bieij’, ‘ka riewkhlaw’, bad ‘ka bieij tasngeng’, man ka por haba u wan sha katei ka madan ha ka por ba u wan iaid step.
“U Wanglet u leh ia ngi kum ki mraw. Ym tang katta, u la byrngem ban weng na ka kam namar ba u dei ba peit ia ka ka map pahara ha katei ka madan” la kynnoh katei ka kynthei ap pahara.
Kine ki kynthei ba ap pahara jong ka Unique Ex-servicemen Security Agency hapoh ka jinghikai u R Marak ki la leh ia katei ka kam la shi snem, da kaba pahara ia ki briew ban ym shah ban leh pathar ha katei ka jaka.
Kane ka madan ialehkai golf ka hap ha ka jingpeit jong Shillong Golf Club bad ka la ai kontrak ha katei ka agency ban pahara ia ka madan.