Shillong:Ki Nongïalam bad ki Kyrtong ban ïakhun ïa ka ilekshon Lok Sabha na Shillong Parliamentary Constituency, ha ka sngi Nyngkong kila ïashim bynta ha ka Symposium halor ka phang Parliamentary Politics and Political participation, bala pyn long da ka Sankardev College.
Kine ki kynthup ïa u kyrtong ka Regional Democratic Alliance (RDA) Robertjune Khar jahrin, kyrtong ka Voice of the People Party (VPP) u Dr Ricky AJ Syngkon, kyrtong shimet u Prof Lakhon Kma. La wan ïashimbynta ruh da u Secretary ka Congress u Emanuel Badwar bad u nongaiktien ka BJP Bah M Kharkrang.
Hynrei, u MP ba mynta ka Congress Bah Vincent H Pala bad kyrtong ka NPP bad Myntri Sorkar Kong Ampareen Lyngdoh ki khlem wan ïashimbynta ha kane ka jingïalang.
Ka ilekshon sha ka Ïingdorbar Lok Sabha ba 18 kan long ha ka 19 tarik Ïaïong ha Jylla Meghalaya.
Haba ai jingkren, u kyrtong ka RDA Robertjune Kharjahrin ula kular ïa ki paidbah ka Ri-lum Khasi Jaiñtia ba lada u shah jied kum u MP, un ïai buddien bad ka Sorkar Pdeng ban pyntreikam noh mar mar ïa ka Inner Line Permit (ILP) ha Jylla Meghalaya.
U ong ba ka nongrim jong ka RDA ka long ban ïada ïa ka bha ka miat jong ki trai ri trai muluk bad ki nongshong shnong ka Jylla.
“Ka thong jong ngi ka long ban pyntreikam ïa ki lai tylli ki P kata ban ïada (protect), pynneh pynsah (preserve) bad kyntiew (promote) bad ban pynurlong ïa kine, nyngkong eh ngi donkam ban ïada ïalade bad dei na kata ka daw ngi kwah ban kular ha phi ba lada phi jied ïa ka RDA, ngin sa pynsngewthuh ïa ka Sorkar ban pyntreikam noh ïa ka ILP ha Meghalaya,” ula ong.
Haba kular ban ïada ïa ka jingburom ïa ki niam bapher bapher hapoh ka Ri, u Robertjune ula ong, “Ngin sa pynthikna ïa ka hok ban mane blei kum ka hok tynrai jong baroh uwei pa uwei bad kane kan ïai neh ha India. Ngin ym shah ïano ïano ruh ban ïuhroit ïa ka hok jong ngi”.
Nalor kane, ula ong ba ka RDA kan ïai buddien bha ruh bad ka Sorkar Pdeng ba kan pynkloi noh ïa ka jingpynrung ïa ka ktien Khasi ha ka khyrnit ba phra jong ka Riti Synshar ka Ri India nalor ban pynbeit noh ïa ka jingïakajia pud hapdeng ka Meghalaya bad ka Assam bad ban bishar biang ïa ka soskular jong ka jingïapynbeit pud ka kylla ba nyngkong hapdeng ki ar Jylla. Ula ong ba ka RDA kan kyntu ruh ïa ka Sorkar Pdeng ban shong bishar biang ïa ka jingïapynbeit pud hapdeng ka India bad Bangladesh ban ïada ïa ka hok jong ki trai Jylla.
Haba kren halor ka roi ka san, une u kyrtong ka RDA ula ong ba un pynthikna ba ka Office Memorandum kaba kular 44% ka jingïoh bhah thungkam ïa ki ST ha ki Ophis Sorkar kin treikam kumba ki dei ban long nalor ban buh ruh ïa ka economic zone ban pynthikna ba ki trai shnong kin ïoh kam 100% ha ki Group C bad D.
U Kyrtong shimet u Prof Lakhon Kma ula ong ba ula pyrkhat sani bha shuwa ban shim rai ban ïakhun ïa ka ilekshon MP ha kaban mihkhmat ïa ki paidbah jong ki 7 tylli ki District ka Ri-lum Khasi Jaiñtia ha Parliament.
Ula ong ba um kyrshan satia ïa ki nongrim jong ki seng saiñ pyrthei bapher bapher ha Jylla bad pynkynmaw ba bun na ki MP ba mihkhmat ïa ka Shillong ki dei ki kyrtong shimet. Ula ai nuksa ïa u Bah GG Swell uba la jop 4 sien ïa ka ilekshon MP kum u kyrtong shimet bad pynliem ïa ka congress bad ki seng riewlum.
Haba ther ïa ka Sorkar ba ïalam da u Modi ha Delhi, u Prof Kma ula ong, “Nga sngew ba lada ki (BJP) wan biang ha ka bor, ngam tip shuh kiei ki jingkylli kiba kin wanrah pat. Wat ïalehkai bad ka Riti Synshar jong ngi. Katba phi dang burom ïa ka riti synshar, ngi dang long kawei ka ri. Nga don ha ka University bad nga ïohi ïa kum kiei ki jaitbriew ba la phah sha ka University, ka dei ka juh ka jingmut jingpyrkhat ka ban jia ha kano kano ka jaka bad nga dap da ka jingsngewkhia ïa kane”.
“Phi donkam ban phah ïa u briew uba lah ban ïeng ha Ïingdorbar marwei bad ban bthah ïa ka Sorkar ba sngewbha wat ym ïalehkai bad ka riti synshar ka ri namar kane ka riti synshar ka tehsong ïa ngi kum kawei ka ri. Ka sngi kaba phi ïalehkai bad ka riti synshar, kane ka ri kan sa pait sa pra lyngkhot lyngkhot bad namar kata, kim dei ban ktah ïa ka nongrim ban burom ïa baroh ki jait niam kiba don hapoh ka Ri,” ula ong.
U Kyrtong ka VPP Dr Ricky AJ Syngkon ula pynpaw ïa ka jingsngewkhia halor ka jinglong jingman ba mynta jong ka Jylla Meghalaya, wat hadien 52 snem ka jingïoh Jylla la ka jong.
Haba kren halor ki kaiphod jong ki agency bapher bapher, ula ong, “Ka long kaba sngewbha bad ba pynduh mynsiem namar ka Meghalaya ka dei ka Jylla ba duk tam. Ka Shillong, kaba ju bna nam kum u jaka pdeng ka pule puthi, hynrei shano ngi poi mynta, ngi lah don ha trai eh. Haba kren ïa ka koit ka khiah, ngi don ha trai duh”.
U Nongaiktien ka BJP Bah M Kharkhrang, ula kren halor ki skhim bapher bapher ba la pyntreikam da ka Sorkar Pdeng. Ula ban jur ruh ba ka Sorkar Pdeng ka la wanrah ïa ka prokram Nasha Mukht Abhiyan ban ïakhun pyrshah ïa ka jingjyllei u drok bad jingdih drok kata ktah ïa ki samla jong ka thaiñ Shatei Lam Mihngi bad ka Ri baroh kawei.
khrong te nang bha