|
Shillong: Ka General Meeting ki nongshet ja sngi ne ka Mid day meal workers ha ki SSA school ha rilum Jaintia ki la pynlong ïa ka jingïakynduh lang myn hynnin ka sngi, ha ïing Dorbar Shnong ka Shnong Ladthalaboh Jowai, haduh kumba 220 ngut ki nongshet ja ki la wan na kylleng ka Rilum Jaintia, ha ka jingdon ryngkat u Ma K. L Pariat President, Kong D. Ïakai Vice President bad kiwei ki dkhot ka All Jaiñtia Muster Roll workers & Labour Union, Jowai, kiba la ai jingkren ai mynsiem ai burom ïa ki nongshet ja sngi baroh bad kiba la ai ka jingkular ban ïalam bad ïarap ïa ngi ki nongshetja ban ïaleh ban pyn ïoh ïa ka hok kaba ki dei hok ban ïoh kum ki longbriew manbriew.
Ki mat kiba la ïakren ki long halor ka jing duna palat ka jingsiew kaba T.1000 shi bnai bad T.10000 (Shiphew Hajar) shisnem bad ka jingtreikam pat ka long naduh ka 8:00baje mynstep haduh ka 04:00baje janmiet naduh ka sngi nyngkong haduh ka thohdieng jong ka taiew.
 Ka jingbym tikna ka jingsiew bad kiwei kiwei de ki lad ai jingïarap na ka sorkar.
Na ka bynta ka longbha longmiat ki para nongtrei mid day meal, la shim ïa ka rai ban seng noh hi ïa ka All Jaiñtia Mid Day Meal Workers Union, Jowai bad kane ka seng kan ïasoh bad ban ïatrei ryngkat lang bad ka seng All Jaiñtia Muster Roll Workers & Labour Union, ha ka jingïalam u Ma K. L Pariat President ka seng.
Ki nongkitkam ka seng kiba la jied ki long ka kong Rihunmon Lamare, President, kong Krety Dkhar Vice President, kong Nela Toi, General Secretary, kong Lana Laloo Assistant General Secretary, kong Rimika Challam, Treasurer bad kumba Ar phew ngut ki dkhot ka Executive Committee.
 La shim ïa ka rai ban dawa na ka sorkar ban pynkiew noh ïa ka jingsiew katkum ka dor ka ïew ka hat mynta, khnang ban ïoh tang ha ka jingïarap bai thied kot ïa ki khun, la shim ruh ïa ka Rai ban ïaleh da kaba tyngeh, khnang ba kum ki nongtrei ba pynbiang ïa ka ja sngi ki khynnah skul kin ïoh ïa la ka hok kaba ngi dei hok ban ïoh.
La kyrpad lang ïa baroh ki MLA, ki Myntri sorkar, ki nongïalam shnong, ki kmie ki kpa jong ki khynnah skul SSA bad ki nongshong shnong ban ïa ai lem ka jingkyrshan, ha kane ka jingïaleh, khnang ba kin nang lah ban ai ïa ka jingshakri kaba bha tam ïa ki khynnah skul.
|
Phi don ban ong eiei?