Kren biej U bah AL Hek, halor ka ILP, maham ka CoMSO

Shillong: Na ka liang jong ka Confederation Of Meghalaya Social Organisation lyngba ka kyrwoh na u Lawyerson war u Vice Chairman, bad u Mawkordor khar Syiemlieh u Joint secretary, CoMSO ki pynrem jur ia ka jingkren u Alexander L.Hek, ha kaba u ong ba ki don tang kumba 30 hajar ki briew ha Meghalaya kiba kyrshan ILP.

Ki la ong ba kane ka jingkren jong u ne u myntri ka tnad koit ka khia ka long ka jing ialam bakla bad ka long ka jing kren khynnah une u briew uba kat dang mih ki sngi u la nang kyrni ka kren biej .

Ki la buh ruh ka jingkylli da kaba ong “Ngi kwah ban tip mynno u Bah Hek u la lum jingkhein, lada u la lum u dei ban iathuh thik ia ka jing don ki nongkyrshan ILP bad mano kita da kaba ai ia ka kyrteng bad ka jaid ba pura ki nong kyrshan ILP bad kumjuh ruh jong kita kiba pyrshah ia ka.” Ngi la sdang lap ksai ba u A L Hek imat u dei u wei na ki nong leit kynshoit bad ialam bakla ia u myntri kam pohing u Amit Shah ba kan pynsah teng ia ka jingpyntreikam ia ka ILP ha ka Jylla jong ngi. Ngi ia tip baroh ba u Bah Hek u jop election na ki poiwir bad imat mynta u pyrshang ban nang pynbun shuh ki poiwir ha ka jylla Meghalaya khnang ba un ioh long Myntri Rangbah namar tang na ki khasi bad ki garo une u briew um ju jop election. Ngi maham ba um dei shuh ban dang bteng ban kren klumar kumne namar kum kine ki jingkren biej ki pynshit ia ki khun samla bad kaba lah ban poi sha ka kynrum kynram bad thut ha ka shongsuk shongsain”.

Ngi kyntu ruh ia ki paidbah ka Jylla bad khamtam ia ki dkhot ka Jaidbynriew ba kidei ban pynpaw sha une u briew ba kum ka Jylla bad ka Jaidbynriew ngi dawa ia ka ILP da kaba thoh shithi, phah message ne watsaap ha u mobile Jong u khnang ba un tip katno ngut kiba kyrshan ILP bad ngi kyntu kyrpang ruh ia ki nongshongshnong la Pynthor-umkhrah ba kin pynpaw sha u ia ka jingthrang ILP ka jong ki bad ba kin kyntu ruh ia u ba udei ban sangeh ka jingkren kulmar hangne shakhmat.