Kot khubor ki dei ban laitluid: HNLC

Shillong, 28 Jylliew:
Ka HNLC ka la ther tyngeh halor ka jingkhang ka Kashari jong ka jylla ia ki kot khubor ba kin pynmih ia kano kano ka khubor khot pakhang shnong lane ki khubor ia khih, bad ka la ong ba ki kotkhubor ki dei ban long laitluid ha ka ri Synshar Paidbah. Ka HNLC ha ka kyrwoh khubor ka la ong ba na bynta ka iaid beit iaid ryntih ha ka jylla ki paidbah ki dei ban iohlum ia ki jingtip kiba biang, bad dei tang ki kotkhubor kiba ai jingtip ia ki paid bah. Katkum ka kyrwoh ka la ong ba ka kamram ki kotkhubor ka dei ban thoh bad ban ai jingtip sha ki paidbah khlem kano kano ka jingshah tuklar lane ba ki hap ban da pan jingbit nangno nangno. Ka la ong ruh ba ha ka jingshisha ka Kashari, ka la dei ban pan jingshai na ka sorkar kaei ka daw ba la pynlong ia ka HNLC ban khot pakhang shnong ym ban khang pyrshah ia ki kotkhubor.