Kordit ki paidbah ka thain Sohra naba ban ka duk tasam

Shillong, 7 Nailar:
Ki paidbah ka thain Sohra, mynta ki la ia kynduh ha ka khim khait bad ki la mad ia ka jing kordit bad ka jingduk tasam ha kine ki sngi bad ka dawbah hangtei ka dei na ka jingbym treikam ka karkhana pynmih dewbilat jong ka Mawmluh Cherra Cement Limited ( MCCL) ka bym shym la lah ban pynmih dewbilat haduh kine ki sngi mynta.
Ka jingbym lah ban pyntreikam noh ia ka MCCL kam shym la ktah tang ia ki nongtrei katei ka karkhana kiba la duh tulop mynta ka phra bnai, hynrei ka la ktah ruh ia ki paidbah katei ka thain baroh kawei naduh ki nongshong iew shonghat, ki nongdie dukan sha bad kiwei pat kiba die ia thied bad ki nongtrei ka MCCL.
Haba pynpaw ia ka jingsngewkhia ia katei ka jingkordit kaba ki paidbah ki hap ban mad u bah Titos Chyne MLA ka Sohra u la ong ba nalor ba ka MCCL kam pat shym la pyntreikam haduh kine ki sngi ruh, ki paid bah ki ia kynduh jingeh naba la khang sa ka jing khlong maw khlong shyiap ha katei ka thain, “Ka thain Sohra, Shella ka dei ruh ka thain kaba ki paidbah ki im na ka thang mawshun, hynrei mynta ka thang mawshun ruh la khang” ong u ba hTitos haba kren sha ki nongthoh khubor mynta ka sngi.
Shuh shuh utei u MLA ka Sohra u la ong ba bun ki nang tharai ba ka Sohra ka la biang kamai tang ka kam jngohkai pyrthei ruh haba ki iohi ia ka jingtuid ki nongshangkai pyrthei sha katei ka thain, phewse u la ong ba ka kam jngohkai pyrthei kam da lah than ban pynim ia ka Sohra haduh katta katta naba ki briew kiba wan jngohkai ki shu wan tang ban peitkai hynrei kim shym la pynlut pisa pat ha Sohra, “Bun ki la song lypa la ka bam ka dih, bad ki jingdonkam jong ki, ki shu wan tang ban peitkai, watla ki la don kita ki jaka bam jaka dih kiba biang ruh” u la ong.
U bah Titos u la ong ba kham mynshuwa ka sorkar ka la kular ba kan sa pyntrei kam noh ia ka karkhana thymmai jong ka MCCL ha ka 15 tarik u jymmang, 2015 hynrei kam shym la lah bad ka la pan por biang da kaba kular ban pyndep ha ka 15 tarik u jylliew, 2015; hynrei mynta la lai bnai ym shym la iohi dak eiei , u la ong. U la pynkynmaw ruh ba khyndiat bnai mynshuwa u la leit ban jurip ia katei ka karkhana thymmai ka MCCL bad ha katei ka jingleit jurip u la ioh ban ia kren bad u Manager ka PROMAX ka kompeni kaba pyntrei ia katei ka karkhana thymmai, ha kaba u la ong ba u Manager u la kular hakhmat jong u ban pynmih dewbilat noh tang hapoh 10 sngi, hynrei katei ruh kam shym la urlong satia kumba u la kular. U la ong ba la ioh jingtip ba katei ka kompeni kam don ki tiar don tar kiba donkam ban pynrung ha katei ka karkhana thymmai.
“Ym dei tang ki bor pyniaid jong ka MCCL ki bym ler ha ka rukom treikam hynrei wat ka kompeni kaba pyntrei ruh kam ler satia, nga shu iohsngew ba katei ka kompeni PROMAX kam dei hi ruh kaba pyntrei ia ki kharkhana dewbilat” ong u bah Titos Chyne haba kren sha ki nongthohkhubor.
Naduh ka u naitung jong u snem 2014 u ba Titos u la ong ba la khang noh ia ka karkhana rim jong ka MCCL bad ha katei ka por u la ong ba la ai daw bym don dewiong, hynrei haba u dewiong u la poi ki la ai daw biang ban pyndep noh syndon ia ka plan ba thymmai bad shen yn pynmih dewbilat noh. “Nga dawa ba ka sorkar ka dei ban shimkhia noh mar mar ban pyndep noh ia ka plan thymmai, ki nongtrei ki la iaishah watla 8 bnai khlem tulop tang ban pyndep noh ia ka plan ba thymmai” u la ong biang bad u la bynrap ba ka sorkar kam shym la patiaw hi ruh ia ka por kaba ki paidbah ki la buh ia ka ban pyntreikam ia ka karkhana thymmai katkum ka rai kaba la shim ha ka jingialang paidbah.