Kordit ki paidbah, ba sniew tasam ka surok ha Iew Mawlong

Shillong:Ka jingsniew bad thliew jong ka surok kaba iaid lyngba na Pump shaduh Anjali, iew mawlong ter ter ka la pynsahkut lut ia ki kali, kiba iaid man ka sngi, na kane ka surok khamtam ki kali kamai.
Ka jingsniew jong kane ka surok ha Anjali, ter ter ka la don kumba da ki bnai, namar ka jingbym peit ka sorkar ban mara mot noh ia kane ka surok bad ka la pynkordit sat ia ki kali na leit ba wan.

Ha ka jingia kren bad u Rupang, na ka liang u President ki nongñiah taxi Law sohtun Unit, u bah Khrawbor Marba ñiang mynta ka sngi nyngkong ka 21 tarik nailar 2023, u la ong “Baroh ka ri khasi jong ngi, ngi tip ba ka iewduh ka dei ka pliang ja jong ngi, hynrei haba kumne ka surok ka sniew ha kaba ngi iaid, ngi ieng ruh ka la shitom”.
U la ong ba kane baroh ka dei ka jingbieit jong ngi hi ki paidbah, namar ngi jied ia ki nongmih khmat ki ba dei tang ki ban ioh jingmyntoi ialade.

Ka sorkar kan eh aiu ban maramot noh ia ka surok ha Anjali, khamtam lei, mynta ka la jan dei sa ka por tlang bad lada pyntrei noh ruh ka lah long. Kaba tieng eh ia ki kali ki ba iaid lada ki don ki maw kiba mih shabar, un leit dei bad sied iano iano kan sa jia ka jingmynsaw, khamtam lada dei ia ki khyllung khynnah, la bynrap u bah Khrawbor.
Ka jingsniew bha kane ka surok, ka dei ha kine ki 3 bnai ba la dep, ka por ba dang jur bha u slap bad ka la pynkhoh lut ia ka surok baroh kawei.

Ym tang kiba ñiah kali ki shitom, ban iaid na kane ka surok hynrei khamtam eh lada don kiba pang ba shitom bad ki ba leit kha khunlung ha ki hospital, ka la shem jingeh, namar ka jingdheng bad jingsniew ka surok bad ka jingbam por ha ka leit ka wan ruh.
Shuh shuh u bah Khrawbor, u la ong ba wat ha nongbah Shillong ka surok ka sniew, haduh katne ha nongkyndong lei ka lah long kum ba shah leh beiñ ha ka sorkar.

U bah Khrawbor, u la kyrpad ia ka sorkar ba la ialam khmat da u Conrad. K. Sangma ba kin sngewbha ban shna noh ia kane ka surok khnang ba ki paidbah, ba leit ba wan kin suk bad la da ka sorkar kam sngap ki paidbah ngi hap ban shu ia iaid satar, hap ia ksaid namar kim lah leh eiei.