Saitsohpen, 9 Nailar:
U nongiasaid Aiñ ka Khasi Hills Autonomous District Council (KHADC) u bah Erwin K Sutnga, u la ong ba lada ka sorkar kam weng noh ia ka jingleh be-aiñ jong ka da kaba klun jubor ia ki jaka kiba hap hapoh ka Elaka Saitsohpen; ka District Council kan ujor sha ka ing bishar ban ai ia ka bishar hok. U bah Erwin u la kob ruh ba lada jia ba ka poi ka jingiakhun ha inglieh ingsaw ka Saitsohpen kan ioh ia ka jingjop naba ki la don ki sakhi ki satar bad ki kot ki sla kiba biang kiba kyrshan ia katei ka kes. “Ngi la ioh ia ka hukum pynsangeh shipor ia ka kam Rangbah Shnong na Supreme Court, ngi la lah ban pynsangeh ia ka jingthmu klun jaka ha Pyllun, Nongsder, ngi la jop ia ka kam ar maloi u bah Pynshngaiñ, ngin jop ia ka Saitsohpen ruh,ngi la pynkhreh kaba donkam mynta ka long sa tang ka jingkyrshan jong phi ki paidbah” ong u bah Erwin haba kren ha ka jingialang paidbah ha phyllaw ka iing dorbar Saitsohpen.
U bah Erwin u la ther tyngeh ruh ia ki nongialam Khasi ha kane ka jylla ha kaba u la ong ba ki klet noh ia ka jinglong Khasi jong ki tang mar ia rung ha jingkhang jong ka Secretariat, “Ngi sngewsih ba ki nongialam jong ki, ki klet noh ia ka jinglong Khasi jong ki tang mar ia rung ha jingkhang ka Secretariat” u la ong. Ha kaba idei pat bad ka jingpynhap ka sorkar ia ka Saitsohpen bad kiwei pat ki jaka kiba hap ha ka jaka ka sorkar phareng kum ka jaka sorkar, u la ong ba ia kane la pyniap noh da ka kyndon aiñ jong ka Section C jong ka Independence Act ha kaba la pynkut noh ia baroh ki jingsynshar phareng bad u la ong ba kaba pynim pat mynta ia ka Saitsohpen ka dei ka Para 20 jong ka 6th Schedule kaba la batai shai ba ia ka khyndew ka shyiap ki long trai ki trai mukul bad ki hap hapoh ka district Council lait noh ka jaka Municipal. Ha katei ka jingialang utei u nongiasaid Aiñ ka district Council u la batai ba u CEM ka KHADC u la pynkupbor bad u la phah ia u ban leit sha Saitsohpen ban ai ka khubor ia ki paidbah katei ka Elaka ba ka KHADC kan bteng ia ka jingialeh.
Ki riew rangbah ka Saitsohpen pat ki la pynpaw ka jinglyngngoh ba shuwa ba ka sorkar kan klun jaka jubor ha Saitsohpen, ki la don katto katne ki ophis sorkar kiba la ioh bor na ka bor Elaka bad ki don ia ka pata khyndew kaba ki hap ban pynthymmai katkum ki por ba la buh hynrei mynta kitei ki ophis kynthup ka Sub-Division kam shym la wan pynthymmai shuh marsien mih ki jingpynbna na ka sorkar kaba pynhap ia ka Saitsohpen ha ka jaka sorkar. U bah H.M Marbaniang pat u la ong ba ka sorkar ka la pynmih sa kawei pat ka jingpynbna kaba la ong ba ki nong Saitsohpen ki dei ki nongwan klun jubor ia ka jaka jong ka, “Lada ka long kumne haei ngin laitluid, yn myntoi aiu ka jingrakhe sngi laitluid jong ngi ha ka 15 tarik nailar” u la ong.
Phi don ban ong eiei?