Kob u myntri, ia baroh 225ngut ki MLA ha Karnataka, ban ia test, la ki ia don tnga buhrieh ne em

U Sudhakar, myntri ka sorkar Karnakata, uba peit ia ka Health and Medical Education, ula kob hynnin ka sngi, ia baroh ki 225 ngut ki MLA, ba kin pynlong da ka test ialade, ban pynthikna ba kim don tnga shuh shawei pat, nalor kawei ka tnga, ba ki don.

U Sudhakar, u ong “Kane ka dei ka jing iakob jongnga bad baroh 225ngut, ngin ia phah test ialade. Ai ka jylla, kan tip, la ngi don tnga buhrieh ne em, nalor ba ngi la don ia la ki jong ki tnga trai jongngi”.

Kham hadien, haba ula shah wohnia na kiwei pat ki MLA bad na u lamphang ka iing dorbar, U Sudhakar, u panmap noh, halor katei ka jingkren jongu.

Katei ka jing iakren ha iing dorbar, ka la pynmih ia shibun ki jing ia kren hapoh ka iing dorbar bad U HD Kumaraswamy, myntri rangbah barim bad uba dei ruh u nong ialam ka JD (S), ula ong ” Lada phi la bud pyrkhing ia la ka jong ka jingim, kan nym jia satia kum kane ka mat jing iakren” bad U HDK, ula phla ruh ha iing dorbar, da kaba ong “Nga ruh nga la kum bakla shisien ha ka jingim jongnga”.

Uwei na ki MLA jong ka seng Congress, U Shivakumar, ha ka jingkren jongu, ula ong “Nga te, nga don tang kawei ka tnga bad kawei ka iing”.