Kob ki nongkhan ba lah ban pyndap mam ia ka Wah Umiam

Shillong,7 Jymmang:
Kat kane ka jingkot dit sat, ba ka jylla ka la mad ha kine ki sngi ia ka jingkyrduh bording ba la kynnoh ba ka daw ka dei na ka jingtyrkhong um ka Wah Umiam, u Rupang u la ioh ban ia kren bad katto katne ngut ki nongshat nongkhein kiba u la iohi ba ha kine ki sngi ba la leit ki la lah ban leh ia ki kam phylla jong ki.
Lah ban kdew ba ha kine ki sngi ba la leit u Rupang u la iohi ba ha pdeng ka jingther u lapbah lapsan haba pynlong ia ka shad suk mynsiem pynban ki nongkhan ki la lah ban pynrang ha kum kitei ki sngi, haba la iohi ba ka la don ka jingkyduh um ha Wah Umiam ne ha Dam ba la pynlong ia ka jylla ban mad jingeh kyrpang u la leit ban ia kynduh ia kitei ki nongkhan ban kylli na ki hato ki donbor ne-em ban wanrah slap ba pyn dap ia ka Wah Umiam.
Ha ka jingiakren bad u Rupang kitei ki nonhkan ki la kop ba ka la dei ka kam kaba suk ia ki ban wanrah slap ban pyndap ia ka Wah Umiam, ki la ong ba ha ka jingshisha ki la isynei ba ka jylla ka la duh bording tang na ka daw ka jingtyrkhong um hynrei ki shim pat ba katei ka kam ka dei ka jong ka sorkar, bad kam dei ka shakri paidbah ba kin noh mon sngewbha, bad kumta ki la shu sngap jar. Haba ia kren matkhmat bad u Rupang uwei na ki nongkhan u Ri-khasi Khongshei, u la kop ba lada ka sorkar ka wan ban ud ban nam ha ki nongkhan ki lah ban pynhap slap haduh shi taiew lynter ban pyndap ia ka Wah Umiam. ‘Kam don jingeh eiei ban pynhap slap shi taiew lynter tang ha Wah Umiam’ ong u Ri Khasi Khongshei haba ia kren bad u Rupang.
Shuh shuh u Rupang u la twad jingmut na kiwei ruh ki nongkhan bad ki nongshat nongkhein , halor ka rukom pynhap slap la ka long ne-em kaba lah ban long, na ka liang jog ki ruh ki la kop ba ka long kaba suk bha ban pynghap slap haduh shitaiew ruh lada ka sorkar ka don ka jingngeit kaba skhem ba ki lah ban leh ia katei ka kam.
Lah ban kdew ba hangne ha Ri-Khasi jong ngi, ka la don ka jingphylla ha ka rukom leh niam ki nongshat nongkhein ha kaba ka la don ka sngi ba u nongthohkhubor ruh u la sakhi dalade hi ba ha ka por bather u lapbah lapsan ki riewtymmen ba leh ia ka knia ka khriam ki la lah ban pynrang rngaw ia ka bneng ba katei ka la jia ha ka por ba ka bneng ka la pynthut ha ka por long shad long kmen hapoh shnong.