Kob ka HSPDP ban jop, ia ka Nongstoiñ & 5 ki MDC

Shillong, 6 Risaw:
Ha ka Central Executive Committee ka seng HSPDP kaba la long mynta ka sngi ka la ia kren halor ki elekshon shiteng samoi, ki ban sa long shen bad kitei ki kynthup ia ka elekshon MLA shiteng samoi ha Nongstoin bad ki elekshon MDC shiteng samoi ha KHADC bad kumjuh ruh halor ka kam nongialam hapoh katei ka seng.
Haba phai sha ka kam elekshon MLA shiteng samoi ha Nongstoiñ ka CEC ka la bynshet ha ka District ban wad ia u briew uba biang tam napoh katei ka seng u ban ia khun, bad ka dei pat ka kamram jong ka District ka ban sei ia uta u briew na katei ka konstitwensi. Haduh mynta ki nongialam katei ka seng kim pat shym la ong eiei ha kaba ia dei bad u kyrtong u ban mih pli ha ka jaka u bah Hopingstone Lyngdoh uba la khlad noh dang shen, hynrei shen ki la ong ba kin sa pynbna hadien ba la ioh ia ka ripod na ka District.
Ha kaba ia dei pat bad ka kam elekshon MDC shiteng samoi ha KHADC, katei ka seng ka la ong ba ka la long kaba la khreh ban ia aireng ha baroh ki konstitwensi kiba dang sah thylli mynta bad ki la don lypa ruh ki kandidet kiba ka la thep lypa hapoh pla hynrei kam pat shym la pynbna haduh mynta bad shen kan sa pynbna pat ia ka kyrteng jong ki. “Ki kyrteng ki kyrtong ki la don hapoh ka pla jong ngi hynrei ngim pat kwah ban pynbna ia mynta” ong u bah Witting Mawsor.
U bah Witting u la ong ba ka HSPDP ka la don kyrtong lypa napoh Rambrai Konstitwensi, na Nongkrem, na Laban-Mawprem, Mawthadraishan, Sohiong hynrei kaba sah mynta ka dei sa tang ka Mairang konstitwensi kaba kim pat ioh briew haduh mynta namarba ki dang peit bniah ia u briew uba biang tam ia aireng ha katei ka elekshon.
U bah Witting Mawsor u la ong ba ba ka HSPDP ka la sngew thikna beit ba kan jop biang ia ka Elekshon MLA shiteng samoi ha Nongstoiñ, katba ha ka MDC pat u la ong ba ki la sngewthikna ba na ka 6 tylli ki konstitwensi, kin jop beit ha ki san tylli.