Kob ka Congress lada U Pariong um jop mynta un ym jop shuh

Shillong, 27 Risaw:
Ka Nongstoiñ Block Congress Committee ka la pynthikna ba ka tiket na ka seng Congress ha Nongstoiñ na ka bynta ka elekshon shiteng samoi ka ban long ha ka 21 tarik u naiwieng kan leit beit sha u Dr.Adviser Pariong. Haba ia kren bad u President ka Block Congress na Nongstoiñ u bah Albinus Kharbani u la ong ba kumba ju long shisien ba la mynjur da ka Block ia uno uno u briew ka tiket ka ju leit beit sha u. “Ka jingialang jong ka district ka la dep, ka la pdiang kumba la mynjur da ka Block Congress na Nongstoiñ kaba sah mynta ka dei sa tang ha ka MPCC, kumba ju long hi shisien ba ka block ka la mon ka tiket la ju ai beit sha uta” ong u bah Kharbani.
Haba kren shaphang ka elekshon u bah Kharbani u la kob ba ka seng Congress kan jop beit da kaba suk ha katei ka elekshon namar ba u Dr.Pariong u la don lypa ki vote bank kiba khlaiñ bad u la kob ruh ba lada jia ba um jop mynta ka kynti ha ka elekshon shiteng samoi un ym jop shuh artad lano lano ruh.
Katkum ka jingiakren bad utei u heh ka seng Congress na Nongstoiñ la sngewthuh ba ka Congress mynta ka kynti kan shim kabu ban pynkhlain ia ka Party jong ka namarba ka la sngewthuh lypa ba kan don ka jingiapait hapoh ka seng HSPDP hadien ba la pynbna ia ka kyrteng u kyrtong jong ka. Wat la utei u nongialam ka seng Congress um shym la kubur ba kate ka seng ka peit ngor iano ban leit kynrup pynsted tang shu pynbna kyrtong ka HSPDP hynrei la sngewthuh ba ki la don lypa ki nongialam ka HSPDP kiba la byrngem ban phet seng lada bakla ai tiket bad ia kitei kiba la byrngem ka Congress ka dang kliaw ia ka por kaba biang ban kynrup ia ki.
U la pynkynmaw ba ha ka elekshon ba la dep ha u 2013 ha ka por ba u Dr.Pariong u la ia khun pyrshah ia u bah Hoping u la ioh 8500 tam ki vote katba u bah Hoping u la jop ia u da kumba 2500 vote eiei. Ha ka elekshon MDC u la pynkynmaw ba u Dr.Pariong u la ioh 9500 vote hynrei u la bah L.G Nongsiej ka HSPDP u la jop salit ia u.