( ïa ki nongdie madan phi beh sha polo, ia ki Khar motor pat phin beh shano? )
Da U Scholar Lawriniang
Nongthliew WKH
Ka jingshah pynthut khah khah ki sem shiliang kup shilliang (Nongdie Madan) ha ki bor sorkar ha la jong ka ri kan kylla long kawei ka daw bah kaba lah ban pynhiar dor ia ka jaitbynriew khasi jong ngi, khamtam eh ha kum kane ka por kaba mynta ka por ba kham hiran ha ka ioh kam ioh jam. Tengteng kane ka rukom leh ka sorkar ka pynkhih bitar ruh ia u paidbah ba bun ba lang na kylleng ka ri khasi kumjuh nga u ba thoh ia kane ruh nga bitar ia kane ka rukom leh matlah jong ka sorkar kaba khlem pyrkhat lem ia ki duk ki suk para khasi katba ia kiwei ki jaitbynriew pat ym nud ban leh eiei hynrei para khasi te ñion ha ban da hap beit shapoh thliew.
Ki bor sorkar khari khari ki ju wan ban beh ia ki khasi ba shong die madan ha ki jaka bapher bapher jong ka sor shillong ia kane ym dei tang mynta ba don ka jingpang Coronavirus hynrei wat ha kiwei kiwei ki por ba la dep ruh ngi shait iohi ba ki shah beh jaka. Hato ka Sorkar ka la leh aiu ia ki Khar motor ha iewduh, Hato phi lah ju beh teng ia ki? Kumba beh ia ki khasi ba shong die madan. Ïa ki khasi ba shong die madan shi bnai phi dang lap wan beh jaka 15-20 sien, Hato phi la leh aiu ia ki Khar motor ha them iewduh la ar snem mynta la iaid hato phin shu sah kut tang ha ka miej pyrkhat kum ki ñiangkongwieng ba sawa tang ka sur pah ba jam khlem iohi tang ia ka dur jong ka.
Hato phi la ju kyndang teng ia ki iing jong ki kumba kyndang ia ki sem dukan ki ba shong madan? Balei tang ki khasi jong ngi kin shu shah pynthud haba shong die jing die kaba mut ka aiñ sorkar ka treikam ban pynshitom tang ia ki khasi? Naduh ba ka lockdown ka dang jur bha ha ki bnai ba la dep nga lap ba u dkhar u ba shong die jingdie bad u ba shang die shana khluit ha iew duh u iaid pawang kum u si lah tam, hynrei ym don ba ong eiei ia ki wat hapdeng ka lockdown ba jur bha. Hynrei mynta lei ym don lockdown shuh te balei lada shong ki khasi pat ym long nalor kata ki la bud ryntieh ruh ia ki aiñ ba la bthah ( Protocol) jong ka sorkar kat kum ka health department hynrei watla katta pat shah shi shah pynthut ha ki bor sorkar.
Ka kam shong die madan ka dei ka kam ba lah ban kyntiew ia ka long briew man briew ban pyndap pynbiang ia ka iing ka sem wat ban kyrshan skul ruh ia ki khun ki kti ha ki kyrdan ba kham heh, Hato ka sorkar ka lah ban bsa ban pjiah lut ia baroh ki ba shong dieng madan lada khang lut ia ki? Ia ki Khasi ong ba ym shah die madan khnang ban ia da ban lait na ka jingialum paidbah briew ban ym saphriang u khiang Covid-19. Katba da ia lum bun briew ki dkhar pat sngap mynthi kum ka wang shah slap, ka sorkar ka leh aiu halor ka jingjia ha jhalupara wat ha kapor ba dang pyrkhing bha hato dei ka sorkar kaba la mudui pyrshah ia ki hapoh high court? Shwa ban leh da pyrkhat 2 3 4 5 sien ko Sorkar. Nga kren ia kane da kaba nga iohi ym da kaba iohsngew.
Kumta shwa ban beh ban pynkynriah jaka ia ki Nongshong die madan bapli la ka long mynta lane ha ka ban sa wan ruh, dei ban weng mar dor shwa ia ki Khar motor bad ban ai jaka noh ia ki Nongdie madan ha them motor ba kin ioh jaka ban shong die jingdie khnang ba kin long laitluid ha la ka ri. Nga kren ia kane ym ba nga pynshit jaitbynriew hynrei da ka mynsiem ba sngewkhia ban iohi ba ki nongshong die madan ki shah pynthut ngam suk satia ka mynsiem kumta nga hap ban pynpaw ia kane ha khmat ka sorkar bad ki myntri sorkar ba dei peit dei khmih ia kane ka kam.
Katba phim pat weng ia ka Harijan:
Wat beh klumar ia ngi ba die madan,
Haba beh da beh beit salonsar:
Wat ia shah liang pat ia u dkhar.
Phi don ban ong eiei?