Shillong:Hynnin ka sngi ka Rangdajied United FC ka la jop noh da 4-2 pyrshah ia ka Ryntih SC bad da kane ka jingjop ka la ioh ia ka kyrdan kaba ar ha ka miej iakhein poin jong ka OC Blue Shillong Premiere League 2021-22 ba lah ialeh ha Third Ground Polo.
Ha kane ka jinglehkai, ka Ryntih ka la ioh thep shuwa ia ka kol kaba nyngkong da u Ebor mi Buam ha ka minit kaba 25. Ka Rangdajied pat ka la ioh ban jubab ia kane haduh shuwa ban kut ka por jong ka kylla step kata ha ka minit kaba 45+2. Hadien kane ka Rangda jied ka la ioh ban nion biang sa kawei ka kol kaba long da ka penalty na u Niawkorlang Kyndiah ha ka minit kaba 48 bad sa kawei biang ka kol jong u Donboklang ha ka minit kaba 57. Ha ka jing lam khmat jong ka Rang dajied, ka Ryntih ka la ioh ban jubab biang ha ka minit kaba 63 da ka kol jong u Sheen Sohktung hynrei la pynthikna noh ia ka jingjop sha ka Rang dajied da ka kol kaba saw na u Wansiewdor Neng nong ha ka minit kaba 82.
Ha shuwa ban sdang ka jinglehkai hynnin ka sngi, ka la don ka jingsngap jar kaba shim minit kum ban kynmaw burom ia uwei na ki refri u Banshanlang Khar byngar uba la khlad noh na kane ka pyrthei myn ha ka sngi thohdieng.
Ha shuwa ban iakhun ka Rangdajied ka ieng ha ka kyrdan kaba lai da kaba kamai 25 poin katba ka Ryntih ka ieng ha ka kyrdan kaba san da 17 poin bad kine ki kynhun ki donkam sa tang mar shi poin ban ioh ban kiew shi kyrdan shakhmat.
Hadien kane ka jinglehkai pat ka Rang dajied kaba la lah ban kamai 28 poin, mynta, ka la ioh ban knieh noh ia ka kyrdan kaba ar ha kaba ka Langsning pat kaba ioh 25 poin kan hap dei ban pynliem ia ka Mawlai SC lada ka kwah ban poi biang ha katei ka kyrdan ha ka jingialeh kaba khatduh kaba yn ialeh ha kane ka sngi thohdieng.
Ka jingialeh kaba khatduh jong ka OC Blue SPL 2021-22 ka ban pynialeh ha ka sngi thohdieng hapdeng ka Langsning FC bad ka Mawlai SC yn pynialeh noh naduh ka por 3 baje nohphai sngi khnang ban ioh ban pynbud pat sa ka jingsam ia ki prais ha ka jingpynkut noh ia kane ka samoi ialeh ha kaba Minister jong ka Sports and Youth Affairs u Shri Banteidor un long u kongsan ha katei ka sngi pynhap pyrda noh ia ka OC Blue SPL 2021-22.
Phi don ban ong eiei?