Knieh jyndat ia ka Iew Nongpoh

Nongpoh, 24 Jylliew:
Ka Synjuk ki Seng Samla Shnong Nongpoh Town (SSSNT), mynta ka sngi ka la pynpaw ia ka jingsngewdiaw halor ka jingleh donbor ka sorkar jylla ha kaba ka la knieh jyndat ia ka bor halor ka jingpyniaid ia ka Market Complex ha Nongpoh na ka Nongpoh Town Committee (NTC).
Ha ka kyrwoh ba la phah da u Samla Donbok Pde, Publicity Secretary kane ka seng, u la ong ba ka synjuk kan pynlong ia ka General Meeting halor kane ka phang ban shim lang ia ka rai ban pyrshah ia kane ka jingleh donbor ka sorkar, ha kaba ia kane ka jingialang yn pynlong ha Dorbar Hall Nongpoh (Sajer) ha ka 28 tarik Jylliew, 2013, ha ka por 2 baje nohphai sngi. Kumta ka seng ka khot bad wer ia baroh ki Seng Samla Shnong ne ki Youth Club ban ia poi khnang khnang sha katei ka jingialang kumba la pynbeit.
Ka kyrwoh ka la ong ruh ba ka synjuk ka la khot ruh ia ka Executive Committee jong ka halor kane, ha ka 23 tarik mynta u bnai bad kaba la pyrkhat lang ban pynrem jur ia kane ka jingthom bor ka sorkar, ha kaba kum ka synjuk ka la dawa ba ia katei ka Market Complex dei ban aiti biang sha ka NTC ban pyniaid biang ia katei ka iew. Kumjuh ruh ba ka synjuk katkum ka jingdawa jong ka mynshuwa ka long ba ki trai shnong bad ki trai Raid ki dei ban ioh ban shong dukan la kumno kumno 90% bad ba ki bar jylla kim dei ban iohlad ban shong dukan ha katei ka complex, la ong ka kyrwoh.
Ha kaba iadei bad kane, na ka liang ka SSNT ka khot bad wer lang ia ki Dorbar Shnong, ki Seng Longkmie bad ki Seng Samla Shnong bad baroh ki paidbah nongshong shnong ba kin ai ia ka kti jingiatreilang ban pynurlong ia kane ka jingdawa, la ong ka kyrwoh.