Kmen u ‘nongmihkhmat’ ka Japan ba treikam pura ka OGP ha Civil Hospital Nongpoh

Nongpoh: U Satoshi Suzuki, uba u ‘nongmih khmat’ jong ka Japan Satoshi Suzuki Oxygen Generation Plant, hynne ka sngi u la wan ban jurip ia ka rukom ban pyntreikam ia ka Oxygen Generation Plant kaba la buh kyrpang ha Nongpoh Civil Hospital. Ha katei ka jingwan jurip jong u, utei u ‘nongmih khmat’ ka sorkar Japan, u la pynpaw ia ka jingkmen kaba khraw eh ban iohi ba ka rukom pyntrei ia katei ka Oxygen Plant ka la iaid beit ha ka rukom treikam.

Lah ruh ban kdew hangne, ba ia katei ka Oxygen Generation Plant ha Nongpoh Civil Hospital, ka dei kawei na kaba la pynmang kyrppang hapoh ka jylla Meghalaya, ia kaba la bei tyngka da ka sorkar Japan lyngba ka United National Development Programme, ha ryngkat ka jingiatreilang ka sorkar India bad Meghalaya.

Katei ka Oxygen Generation plant, ka lah ban pynmih haduh 150 LMP, kaba la long ruh ka jingmyntoi eh hapoh katei ka Hospital lada don kino kino ki briew kiba la shitom jur bad kiba la donkam kyrkieh ban ioh ia ki tyndong Oxygen hapoh katei ka hospital.

Ha katei ka sngi kaba utei u ‘Nongkit tien Syiem’ u la leit ban jurip ia katei ka Oxygen Plant ha Nongpoh, la sakhi da ka jingdon u James K Sangma, myntri ka sorkar jylla, ha ryngkat ka jingdon u Dr. Aman Warr, Director DHS (MI), u Dr. P.N Chyne, Medical Superintendent ka Nongpoh Civil Hospital lem bad kiwei.

Haba iadei bad katei ka jingwan jurip, u Satoshi Suzuki, u la pynpaw ia ka jingkmen kaba khraw eh ban iohi ba katei ka Oxygen Plat ka la iaid beit kumba la phah da ka sorkar Japan lyngba ka UNDP-India bad uba la kyrmen skhem ba katei ka Oxygen Generation Plant kan da iarap ia kiba bun ki briew bad kiba donkam kyrkieh ban ioh ia ka lyer Oxygen ha kine ki sngi ki ban wan.