Kmen ki nong otdoh ba jurip ka FKJGP ia ka iew masi

Shillong, 08 Nailur:
Ka seng ki nongot-doh masi, ka Khasi Jaintia Butcher’s Welfare Association (KJBWA) ka pynpaw ia ka jingsngewn-guh ia ka jingwan jurip ba kynsan jong ka seng FKJGP hapoh ka jingia-lam jong u General secretary bah Dundee Cliff Nongsiej ha ka 6 tarik mynta u bnai kaba dei ruh ka sngi iew masi khanapara.
Ha ka kyrwoh ba la pyllait, ka KJBWA, ka la ong ba kane ka jingwan jurip ba kynsan ka FKJGP, ka pynlong ia ka seng ban kyrmen skhem ba ki jingthmu ba bha jongki kin long kiba seisoh ha ryngkat ka jingiatreilang.
“Ngi kum ka seng ki Nongot doh masi na ka por sha ka por ngi ju pynsngew ia ki jingeh jong ngi sha ka sorkar lyngba ki tnad treikam jong ka,hynrei ngi pynpaw ka jingsgewsih bad duh jingkyrmen naba ka sorkar kam shym la shim khia halor ki mat dawa da ka seng”,la ong ka kyrwoh na ka seng KJBWA.
Lah ban pynkynmaw, ba ka FKJGP Central body ka la hiar jurip ia ka iew die masi, ha ka sngi hat majai ba ladep, ha Khanapara bad ha katei ka jingleit jurip ka la lap ba ki don da ki hajar tylli ki masi ha katei ka iew kaba heh. Ha kajuh ka por ka la lap ba hapdeng kitei ki hajar tylli ki masi ki don ruh kiba dkoh,kiba la iap hangtei.
Lah ban kdew ba katei ka jingleit jurip ka FKJGP ka dei da ka jingmut ban pynthikna ba ki doh kiba die ha iew ha hat ki dei ban long kiba bit ban bam bad ki bym don jingpang. Katei ka seng ka kwah ba ki doktor na ka tnad Veterinary ki dei ban pynthikna ia baroh ki jait mrad ba bam doh ba ki dei ban long kiba shait ba khlaiñ shuwa ban ot doh ia ki. Halor ka jinglap jong ka ia ka jingbym biang katei ka seng ka la ong ba kan leit ia kynduh sorkar ban ia kren na bynta katei ka mat kaba ktah ia ka koit ka khiah.