Kmen ka SRS RB Mihngi,ba shimkhia u myntri bad ka NEIGRIHMS

Nongpoh, 13 Jylliew:
Kum shi bynta ban ai khublei ia ka jingiohi jngai jong ka tnat ka koit ka khiah bad ka NEIG RIHMS, ka synjuk ki Rangbah Shnong (SRS), Ri-Bhoi Mihngi, kaba long ruh ka synjuk kaba la mihkhmat na ki hynriew phew tylli ki shnong katei ka thaiñ, ka ai khublei kyrpang eh ia kitei ki ar tylli ki bor ka koit ka khiah.
Katei ka Synjuk ki Rangbah Shnong kam lah ban pynpaw ia ka jing kmen kaba khraw eh hadien ba ka tnat ka koit ka khiah lyngba u myntri jong ka, u Bah A.L Hek bad ki ophisar ka NEIG RIHMS, kiba la shimkhia baroh arliang ban aiti bad shimti noh ia ka Bhoirym bong CHC ba ki nongsu mar pang na katei ka institute kin ai ia ka jingsha kri kaba bha tam eh sha ki paidbah nongpang ka Ri-Bhoi mihngi. U Bah F.M Mawphniang, president bad Bah S Basaiawmoit, general secretary, haba kren bad ki nongthoh khubor, ki la ong ba ka dei ka kambah bad ka jingiohi jngai jong ki nongpeit ia ka tnat ka koit ka khiah, khnang ban rat dyngkhong ia ka jingpang kaba ju lynshop man ka por ia ki paidbah ha katei ka thaiñ.
Kum ka synjuk ka pdiang sngewbha ruh ia ki nongsumar pang na ka liang ka NEIGRIHMS, Mawdiangdiang, ban ai jingshakri kaba paka bha sha ki paidbah kiba donkam jingiarap na ka por sha ka por bad ba kane ka jingwan jong katei ka jingthmu ki nongialam ka tnat ka koit ka khiah kan long ruh ka jingkyrkhu ia ki paidbah khamtam kito kiba wan na ka longïing kaba duk ba kyrduh bad ba kin lah ban kyrshan la ki jong ki tnum ki tyndai jong ki watla wan ka pang ka thait ha ki ïing ki sem. Ka SRS ka kwah ruh ba kane ka jingthmu kan urlong noh shen bad ba ki nongsumar pang na katei ka institute kaba don ha kane ka jylla kin sdang noh ia ka jingtreikam jong ki.