Kmen ka Mawjynrong ba ioh maw nongrim

Shillong, 05 Nailar:
Ka Durbar shnong Umsaww Mawjynrong ka dap da ka jingsngew kmen namar ba ka la ioh ia u maw nongrim na MDC u Bah Process T Sawkmie uba dei u Deputy Chief Executive Member KHADC.
Ia une u maw nong rim la thung mynta ka sngi ban shna ia ka Madan ialehkai hapoh ka Shnong.
Ha kane ka sngi thung maw nongrim la don lang u Rangbah Shnong Bah J. Khong kiang, ki nongkitkam shnong, ki nonghikai, ki khynnah skul, ki kmie ki kpa lem bad baroh ki nong shong shnong. Ha kane kajuh ka sngi u Bah Sawkmie ula aiti ia ka Work Order kaba T. 5 lak ha ka kti u Rangbah Shnong, kaba la mang  ia kane ka madan bad ula ong ba ka Local Committee kan sa pyntrei iakane ka kam.
Kum ka dak ka jingsah jing kynmaw ia kane ka skul hapoh ka shnong kila pynkhreh ruh ia ka March pass ha kaba la iashim bynta naduh ka skul RCLP, Presbyterian bad Upper Primary School Village bad la sam ruh ia ki prize iakiba la jop.
La ioh ruh ka jingkren naduh u Rangbah shong, Preaident Seng longkmie, Head Teacher, Bah S. Rynjah. Hakaba baroh ki nongkren kila ai khublei ia u Bah Sawkmie namar ka jingshim khia jong u kum u MDC na ka bynta ka shnong. Bad kila ong ba wat ha ka kyrdan MDC kaba long ka kam kaba rit ula lah ban wanrah ia ka skim Madan Football, kaban long ka jingmyntoi kaba khraw ia ki khun samla jong ka shnong.
Ki don ka jingkyrmen ba hadien ba ladep ban shna ia kane ka madan kum ka shnong ngin salah ban pynlong ia ki tournament kiba heh ba wat ki Inter school Sport bad kiwei kiwei ki jingdonkam yn sa lah ban pynlong ha kane ka madan.