Kmen ka Elaka Saitsohpen ba shim khia u CEM

Shillong, 17 Lber:
Ka Elaka Saitsoh pen ka pynpaw ka jing nguh ïa u Bah P.N. Syiem, u CEM ka KHADC uba la shim khia ïa ka jingkyrpad ka Elaka ha kaba iadei bad ka jingklun jaka jubor jong ka sorkar ha Saitsohpen.
Ha ka kyrwoh ba la pynlait, u Sirdar u Bah TR Malngiang u la ong ba ka EC baroh kawei ka la pyrshang ban wad ïa ki lad ki lynti ban weng ïa kane ka jingeh kaba la ïa kynduh la slem bha bad dei ha ka 13 tarik Kyllalyngkot ba u CEM ula wan jurip ïa ki jingklun jaka jubor ka sorkar ha kaba ula kular ban shim khia bad kum ka shnong ngi ai khublei ha kaba khamtam ula rah ïa kane ka mat hakhmat ka ïing dorbar mang tyngka.
U Sirdar u la ong ba naduh ki por hyndai ka Elaka Saitsohpen ka dei kawei na ki Hima/Elaka kaba hap nadong shadong hapoh ka jingpyniaid ka District Council. Dei ka District Council kaba pynlong ïa ka jingjied Sirdar, kaba ai sanad ïa u Sirdar, kaba mynjur ïa ki nongkitkam bad ki dkhot ka EC Elaka, kaba ai pata sha baroh ki nongshong shnong kynthup ruh ïa ki Office Sorkar katkum ki kyndon jong ka District Council, kaba peit bad pynthikna ïa U Pud U Sam, ka khyndew ka Shyiap bad kiwei.
“Ka Elaka Saitsohpen ka pynpaw ka jingkhublei ïa u CEM ba u sngewthuh shai ïa kane ka jingdonkam bad kum ka Elaka ngi Shaniah tylli ha ka jingstad u CEM lem bad ka Council baroh kawei bad ngi ngeit skhem ba da ka jingshim khia ka jingangnud ka Elaka kan poi sha ka jingjop,” ong u Bah Malngiang.