Klun ia ki shnong Khasi, shna pynheh ka Assam ia ka surok ha Sabuda

Nongpoh: Ka jingbym shim khia da ka sorkar jylla ban pynpoi ia ki kam pynroi sha kito ki shnong Khasi, kiba don ha khappud ka Meghalaya-Assam, kiba dei ruh ki shnong kiba dang don hapdeng ka jingiakajia pud hapdeng ka Meghalaya-Assam, ka la long ka kabu ksiar ia ka sorkar Assam ban kyntur pud, da kaba pynpoi ia ki kam pynroi ha kitei ki shnong.

Kawei na ki sakhi kiba shai kdar halor katei, ka dei ha ka shnong Sabuda, kawei na ki shnong Khasi bad kaba dang iajan eh bad ka Mawlasnai, ha kaba kham mynshwa la iohi ba katei ka shnong ka dang don tang kawei ka surok shnong kaba rit, ia kaba la pynpoi da ka Assam, hynrei mynta la iohi pat ban mynta ka sorkar Assam, ka la shimkhia ban pynbha ia katei ka surok bad pynheh ruh ia ka haduh ban da poi ha ka Police Outpost ka Assam, kaba don hapoh jong katei ka shnong.

Ka long ruh ka jingshisha ba bun na ki shnong Khasi kiba don ha katei ka thain, kiba kynthup ia ka shnong Khlieh Umwang, Madan Umwang, Jatalong, Sabuda, Umtlih, Umlapher lem bad kiwei, ia ki kam pynroi bad khamtam ia ki surok, la shimkhia bad la leh lut da ka Assam, ha kaba la ioh ruh ba ki lynti bad ki surok kiba la pyniasoh sha kitei ki shnong la leh lut da ka Assam.
Haba wad jingtip na ki briew kiba sah ha katei ka thain, la ong ba ka sorkar Assam ka kham shimkhia bad da lehbha shisha ia ki shnong Khasi kiba don ha katei ka shnong bad halor kata la iohi ba bun na ki kam pynroi khamtam ia ki surok, la shimkhia da ka sorkar Assam ban pynpoi lut sha baroh ki shnong Khasi, na ka bynta ban pyniasoh kawei ia kawei pat.
 Katkum ka jingiathuh da ki briew na kitei ki shnong, la ong ba jin lada ka sorkar Assam kam shimkhia ban pynpoi surok sha kitei ki shnong, kan da long shisha ka jingeh kaba khraw ia ki paidbah ha ka leit ka wan, ha kaba kat haduh mynta ym pat la don kawei ruh ka surok, kaba ka sorkar Meghalaya ka la shna sha kitei ki shnong Khasi bad kiba dang don hapdeng ka jingiakajia pud hapdeng ka Meghalaya bad Assam.
Ka long ruh ka jingshisha ba ka sorkar Meghalaya, kam shimkhia ban pynpoi ia ki kam pynroi sha kito ki shnong Khasi kiba don ha khappud bad ka Assam, ha kaba lada phai tang sha ka thain Block- 2 bad ki shnong kiba dang hap hapoh ka Raid Nongtung bad kiba dang dei kita ki shnong kiba dang lait na ka jingwan kyntur pud ka Assam, la iohi ba ka sorkar Meghalaya kam shem la shimkhia ei ei ban pynpoi ia ki kam pynroi bad khamtam eh haba iadei bad ki surok.