Kloi U Bah Hek, ban long ksiang iakren iasuk ia ka HNLC bad ka sorkar

Shillong:U myntri ka tnat ka koit ka khiah ka jylla u Bah A.L Hek, mynta ka sngi, u la ong ba u long ba kloi ban long ksiang, na ka bynta ban ialam iaka seng kieng atiar ka Hynniewtrep National Liberation Council (HNLC) ban iakren iasuk bad ka sorkar Meghalaya bad ka sorkar India.

U Bah A.L Hek u la ong ba ka jylla Meghalaya ka donkam ia ka jing iasuk bad ka jing shngain bad namar kane u long ba u kloi ban lamkhmat ia kino kino ki seng ban wan shaka miej iakren iasuk bad ka sorkar.

Kumban shu pynkynmaw, dang shen u president ka Meghalaya Bharatiya Janata Party (BJP) u bah Ernest Mawrie u la ong ba ka Meghalaya BJP, ka kloi ban pdiang ia ka HNLC, na ka bynta ban iakren iasuk noh bad ka sorkar Meghalaya bad sorkar India.

“Na ka bynta ban wanrah iaka jing suk bad jing shngain hapoh ka jylla nga long kaba kloi ban khot iakren iaka HNLC bad u myntri kam poh ing ka sorkar India u Amit Shah ban iakren iasuk noh” la bynrap u bah A.L Hek.
Haba jubab halor ka jing kylli hato ka sorkar ka lah ne em ban pdiang iaka jing dawa ka HNLC, na ka liang u Bah A.L Hek u la ong ba ka mat ba nyngkong eh ia ka HNLC bad ka sorkar ka dei ban poi ha ka miej ban iakren iasuk bad nangta ka sorkar India kan sa bishar bniah ia ki mat dawa ka HNLC.