Kloi U bah Ardent ban mih madan ban iakhun pyrshah ia ka CAA

Ki snem ki lah tyllun, ha bun ki jingiakhih jingdawa bad jingangnud.Ki sorkar lah wan lah leit, hynrei kaba sngewsih ka long ba ju don mo haba lah iaw lah ih ka rta ban sah lyngkrang sah? Ka Ri da isynei da peit ia pha, pha sah lyngkrang bad iuh roit kat ba kwah rung kwah prong.
Kawei ka sohpdung ka wan da ka jingbym sngap ka sorkar ban ai ILP kumba don lem kiwei pat ki para lam mihngi.Nalor kane ai da u sohkthang ka CAA ban pduh imat haduh da dem ngon ki khohsiew ka Ri Khasi.
Lah mih ki seng bun tylli,lah mih ki jingiakhih bun sien,lah ai jingkyrshan u paid bylleiñ,hynrei kum ka ‘erlangthari shiphang ka jah noh.Ki daw ngim lah ban tip.
Hynrei kat dang im ka mynsiem,ngi u paidbah ngin ym shu sngap jar.Namar ngi thrang ba ka lawei ka Ri na bynta ki khun ki kti, kan long kaba bha kaba laitluid.Mano ban kwah ban long mraw ha la ka Ri lait tang u khawpud u ingkhongshyllangmat?
Ha kane ka por ba i triem, ngi kyrpad sngewrit ia phi baroh ki longkmie longkpa,khynnah samla,u nongsor u nongkyndong khlem ia peit shiliang khlem ia buh nud,ban mih paidbah biang,kawei ka sur ban iakhun pyrshah ia kano kano ka aiñ ba long pyrshah ia ka jinglaitluid bad ka hok u paidbah kaba lah mang da ka konstitution ka Ri India.
Ngim pat duna nongialam,ngim pat duh ki nongialeh kiba shlur ban iakhun tyngeh namar ka Ri baieid,ngi donkam tang ka jingshlur bad ka jingiatylli.
Ki nongialam bym pyrkhat tyngka, bym pyrkhat shuki bym pyrkhat bor,ia kita ngin ai ka kti kamon ka kti kadiang. Ngi lah iohi ia ka jingkren ruh u wei na ki rangbah ka jaitbynriew kum i Bah Ardent Basaïamoit, ba i lah long iba la kloi ban mih madan ban iakhun pyrshah ia kane ka CAA, bad ngi kyrmen ruh ba in pynurlong noh kham kloi shwa ba ka por kan dier noh.Ngi ngeit ba dang don ruh bun ki nongialeh ki ba shlur bad shi sur kiban iamih ryngkat lang ha kane ka jingiakhun.
Lada ngi la lah ban iakhun ia ki dohlieh ha ki spah snem mynshwa,kaei ka daw ba ngin artatien iamynta?
“Dei ha u Rangbah keiñ ka shong ka mon ba jwat”
Lada ngi dang tieng,dang riej,lada ngi dang im khlem salia ia kiwei,Ka Ri kan iap kordit khlem ka lawei.

Ngi ia wer ia baroh uba don ka snam ki khlawait ka Ri Khasi,ban mih khlem sheptieng,khnang ba ngin pyntikna ba kane ka Ri baieid kan khie im biang sa shisien,ki Hima ki Dorbar ka Ri ,ki syiem ki Lyngdoh ka Ri u Hyññiew trep hyññiew skum,sa shisien kin ieng sakhi biang,ba kane ka Ri kam dei ka ‘them mator ‘ ki poiwir poiei,ba ngi dei ban don ki lad jingiada ba khlaiñ bad ym don mano mano ruh uba kham khraw ban ia ka Hok ka Sot ka Hukum ka Ri.

Khublei shibun,
Ka kynhun ieid
Ri ki Samla Mawlai.
J Dkhar, R majaw,K ryngkhlem,D Dkhar, F kurbah, D warjri, D nongbri.