Shillong: Ka CEC jong ka Khun Hynniewtrep National Awakening Movement, mynta ka sngi, ka la wan ban pynshai ba ka Election Commission jong ka Ri India, ka la ithuh ia u bah Adelbert Nongrum kum u President jong ka KHNAM.
Haba ia kren bad ki lad pathai khubor na ka liang u bah Adelbert, u la wan ban pynpaw, halor ka jingkloi jong u ban wan noh sha ka miej ban ia kren ia suk bad u bah Pyndapborthiaw Saibon, hadien ba u bah Saibon u la pynpaw ia ka jingkwah jong u ban ia kren ia suk noh ha ka 18 tarik u Lber 2021. “Ha ka jingiaid lynti kaba la long 20 snem ki don bun ki jing ia kajia hapoh ka iing ka sem jong ka KHNAM, ha kaba kane ka jingpynshai kan long kaba pynshai ia ki paidbah bad kumjuh ia ki nongialam teng ia ka khnam khamtam u bah Pyndapbor thiaw Saibon bad kiwei kiwei” u la ong.
U bah Nongrum, u la ong ba ha ka 18 tarik u lber u bah Pyndapborthiaw Saibon, u la pynpaw ba u long u ba kloi ban iakren ia suk, lada u bah Adelbert bad ki kynhun jong u ki long kiba kloi ban wan sha ka miej ban ia kren ia suk,ha kaba na ka liang u bah Adelbert ruh u long u ba kloi ban iasuk noh.
Ka KHNAM ka dei ka party kaba kham pher na kiwei ki political party bad ka jingkwah ban ia suk noh, ka dei namar ba la thaw ia ka KHNAM ka long namar ba ka don ka thong ban shakri ia ka Ri bad ka jaitbynriew, u la bynrap. U bah Nongrum, u la ong ruh ba ka jingthaw ia ka KHNAM, ka dei halor ban ialeh ban weng ia ki mat jingeh jong ki paidbah, ym ban iaknieh nongialam kumta na ka kynhun u bah Adelbert u long u ba kloi ban pdiang ia ka jingiasuk bad kane kan shong ha u bah Saibon.
Phi don ban ong eiei?