Kloi ka UDP ban pdiang ïa u Bah Anthony, ba un ïakhun na Pynursla

Shillong:U Chief Executive Member (CEM) ka Khasi Hills Autonomous District Council (KHADC) u Bah Titosstarwell Chyne, ula ong ba ka United Democratic Party (UDP) ka kloi ban pdiang ïa u Bah Anthony Kongwang lada u wan ïasoh sha ka party.

Lah ban ong hangne ba ha ka 26 tarik Nailur u Bah Anthony Kongwang, u ba dei uwei na ki nongkyrshan ba radbah jong u Symbud Myntri Rangbah ka jylla u Bah Prestone Tynsong ula mih noh na ka National People’s Party (NPP) bad la suba ruh ba un ïakhun hi ha ka ilekshon 2023.
U District President ka UDP East Khasi Hills Bah Titosstarwell Chyne ula ong ba ka party ka kloi ban pdiang burom ym tang ïa u Bah Anthony hynrei wat ïa ki paidbah ruh na ka bynta ban pynkhlaiñ ïa ka party.
U Bah Titos ula ïathuh ba ka party ka la aiti ha u MDC ka Laitkroh Langkyrdem u Bah Ryngkat Lyngdem ban pynïaid ïa ka ilekshon hapoh Pynursla konstitwensi 2023 bad na ka liang ka Circle kan sa leh ia kaba donkam.

“Haba ïadei bad ka jingjied kyrtong ban ïakhun ilekshon, ka UDP ka aiti beit ha ki Circle ban jied lane ban ai jingmut ïano yn jied kyrtong ban ïakhun ïa ki ilekshon,” la ong u Bah Titos.

U Bah Titos ula ong ba ka UDP haduh mynta ka pat ïoh pdiang shithi ne kyrwoh haba ïadei bad ka jingkwah u Bah Anthony Kongwang ban ïasoh noh bad ka party, hynrei lada u kwah shisha ban wan sha ka party, ka party ruh ka kloi ban pdiang ïa u.