Kloi ka KSU ban mih madan, ban ïada ïa ki Khasi na ka UPFKL

Shillong:Hadien ba ka jingmih ha ki kotkhubor ba ki don kita ki kynhun kieng atiar kaba tip kum ka United People’s Front Of Karbi Longri (UPFKL) kiba thmu ban pyntieng pynsmiej ïa ki Khasi-Pnar kiba shong ba sah ha la ki jong ki jaka ki puta kiba don ha Block-1.

Kumta na ka liang ka Khasi students union(KSU) jong ka West Jaiñtia Hills District ka phah ïa kane ka kyrwoh khubor sha ki paradoh parasnam, kiba don ha kitei ki jaka bad ïa baroh kiba shong basah markhap bad ka Assam ba kim dei ban tieng bad ban shong syier.
Ka seng kan long kaba la kloi ban ai ïa ka jubab ïa kita ki Kaikhlaw kiba thmu ban wanrah ka jingpyntieng bad ban ïuh roit ïa ka hok ka kynti ki paid Khasi kiba don ha Block-1.

Ka Seng ka kyntu ïa ki paradoh parasnam ban kin ïaid kin ïeng kumba ju long baroh shi katta bad ban kamai ka jih laitluid ha la ka jong ka khyndew Lajong.

Ka Seng ka maham ruh ïa kata ka Seng Kaikhlaw kaba tip kum ka (UPFKL), ba lada ka kwah ban ïa tyngkhuh ka Seng ka la long kaba la pynkhreh ban ïa mih ha madan bad ruh lada jia eiei ïa ki doh ki snam Khasi kiba shong ha kitei ki jaka ka Sorkar Assam bad ka Sorkar Meghalaya ki dei ban shim ka jingkitkhlieh, kane ka long katkum ka kyrwoh kaba la phah da u samla Juhi Tariang nongai khubor ka KSU na WJHDU.