Nongpoh: Ka Khasi Student’s Union, North Khasi Hills District, ka la ai ia ka jingkhublei kaba kyrpang ia ki Bor Distrik ka Ri Bhoi, kaba kynthup naduh ia ki Pulit bad ia ki briew kiba peit ia ka koit ka khiah, namar ka jinglah jong ki ban shimkhia, na ka bynta ban peitngor bad pyrkhing halor ka jingwan ki briew ba nabar ka jylla, kaba long ruh kum kawei na ki lad ban tehlakam halor ka jingsaphriang jong ka Khlam COVID-19.
Ha ka kyrwoh kaba la phah da u Samla Ferdynald K. Kharkamni, President ka KSU, NKHD, u la ong ba ka Union ka long kaba la kloi ban ia don ha syndah ban ai ka kti ka mon ka kti kadiang ha kaba kum kane ka por, na ka bynta ban ia shimkhialang, khnang ban yn lah ban tehlakam halor ka jingsaphriang u COVID-19 hapoh ka jylla Meghalaya. Lyngba katei ka kyrwoh, ka Union ka la pynpaw ruh sha ki Bor Distrik ka Ri Bhoi, ba lada ki donkam ia kino kino ki jingiarap, na ka liang ka union ka long kaba la kloi ban mih shakhmat, namar baroh ki tnad trei kam ka Seng ha baroh ka jylla la bthah ban ia tynrong lem ia kane ka kam ha ryngkat bad ki Bor District,ki bor jong ka tnad ka koit ka khiah lem bad ki bor shnong bor thaw.
Shuh shuh, la pynpaw ruh ba ka Union ka kyrpad ia baroh ki nongshong shnong ka Ri Bhoi District bad jylla hi baroh kawei, ba ki dei ban iasnohktilang bad ki Bor District bad ruh ba ki dei ban burom ia ka jiingpynjari curfew bad kata ka long ba ki dei ban shongkhop hapoh ki iing ki sem, da kaba kim dei ban mih sha surok katkum ba la bthah ia ki.
Nalorkata, ka Union ka kyrpad rit ruh ia baroh ki samla pule bad ki paradoh parasnam kiba lah wan na bar jong ka jylla, ba ki dei ban shimkhia da kaba leit phah test, khnang ba kan nym don kano kano ka jingsaphriang ia une u khniang jingpang hapoh ka imlang ka sahlang.
Ka Union kyntu ia baroh ki shnat treikam ha baroh ka District bad khamtam ha ki thain khappud kum ka Byrnihat, Khanapara, Umsiang, Rani Bari, Umden, Mawlasnnai bad Patharkhmah, ba ki dei ban long kiba peitngor ba kin nym don ki briew kiba pynkhein iaka ka ain kiba wan rung kynthlep ha kum kane ka por, pynkut ka kyrwoh na u Samla Ferdynald K. Kharkamni.
Khadduh khatwai, ka Union ka la pynpaw ruh sha ki Bor Distrik ka Ri Bhoi, ba lada ki donkam Ambulance, na bynta kino kino ki kam kyrkieh, na ka liang ka seng ka la long kaba la pynkhreh na ka bynta ban aiti ia ki Ambulance, pynkut ka Kyrwoh na u Samla Ferdynald K. Kharkamni.
Phi don ban ong eiei?