Klet Noh Shuwa Īa Kaban Pynlong Skul Mynta U Snem

Bah Francis Syiemlieh

Lehse kin don kiban ong: kane kalong kabym lah long. Hynrei da kaba pynshongnongrim bha īa kane ka jinglong jingman kaba mynta pat kabym pat itikna, kane ka phang kan long ka mat kaba ngin hap ban īapyrkhat biang sa shisien shuwa ba ngin ong ba kalong ‘kabym lah long.’ Ne hato ngin īa-ong lang kumba ong u Delhi Chief Minister ba ka Delhi kan hap ban plie noh bad ba ki briew kin hap ban īa-im lang bad ka Khlam COVID-19?

Hato ka nongpynīapbriew (killer) namarba kadei ka nongpynīapbriew kan pyllait-im īangi, haba ngi la ailad hi īaka ba kan pynīap īangi? Kumno kan lah ban long ba ngin hap ban īa-im lang bad ka nongpynīapbriew? Kumno ngin shlan thurmur ban kheiñ kamkai īa kaei kaba ki riewstad ki ong ‘Ki biej ki īatur sha kaei ba ki angel ki tieng’ ne “The fools rush where the angels fear?” Hato mangi ha kane ka Jylla ruh ngin īa lehbiej lang ne ngin īabud lang īa kiwei pat kat hapdeng jong kat kane ka saw ka sian kaba itieng da shisha shisha? Balei ngi dei ban shu ailad beit tang īa kito ki ‘high profile persons’ bashitengkhlieh ba kin rai hi beit katba ki mon halor ka lynga ka pisa jongngi? Kum ki kmie ki kpa jong ki khynnah skul, ngi donkam ba kin da kylli lem shuwa nangi lada kala long ne em ban pynlong skul noh.

Ki jingkylli ki bteng: Balei ki kwah ban pynlong skul noh, ban kñia da ki khun jongngi sha kane ka Khlam? Ki kwah aīu na kane ka Khlam – ki scheme, ki project bad ki fund ban pynriewspah īano īano? Hato ka lahbiang ba kin īapyrkhat stad hi tang para maki? Hato ha kano kano ka State la ai ‘hok’ tang īa ki riewpawkhmat ba kin shim rai? Hato ngin shu īahun beit kumto wat lada kin pynbor īangi ba ngin long beit tang kum ki mraw bakohnguh-sneng jong kane ka ‘Inflated and Corrupt Commodified Education System’ (ICCES) kaba kyrkieh lynter? Kane ka “ICCES” bakyrkieh lynter jong kane ka juk DEVIL-LOVE-MEN (development) leilei, namarba kalong kaba ‘khlem Blei-khlem moral,’ kam nang shuh ban pynīajngai īalade na ka pap ka sang (taboo) bad na ka saw ka sian (dangerous evil). Balei? Namarba ka khlehbiej pisa! Kane, nyngkong ka kyntiew stet īa ki briew wutwut kum ka ding baklang da ka bor jong ka pisa, bad ynda ki briew kila ingkhong ne kylla riewbymman pat ka sa pynhap īaki arsut shapoh pyrthei kum u dpei bapynjakhlia (polluting ash) ban lehsniew shuhshuh īa ka pyrthei. Dei na kata kadaw ba ki sa mih ki briew kiba pyrta shla: ‘JINGSTAD, JINGSTAD, JINGSTAD, WAT LADA NGIN KYLLA MRAD!’ Nga pat nga ong “ym donkam jingstad da kaba thom īa ka pap ka sang bad īa ka saw ka sian, namar ka basniew kam ju pynkha īa ka babha.” Bad mynta ngim donkam shuh ban pynkynmaw ba ngi don hapdeng jong ka jingīalehpyrshah bad ka bor jong ka pap ka sang bad jong ka saw ka sian, na kadaw jong kane ka Khlam Coronavirus. Hato kam dei ka pap ka sang bad ka saw ka sian ba ngin pynngat jingpang-khlam halade bad ba ngin pynbit pateng pat īaka sha kiwei de? Hynrei kidon pat ki ‘riew-khlem-khlieh (headless philosophers) ha kane ka juk ‘devil-love-men’ kiba kwah ban ai jingnang jingstad īa ki briew da kaba thom khnang īa ka sang jong ka saw ka sian (ignore taboo and head towards danger). Kiba kum kine ki briew kidei kitei ki biej kiba īatur larlar sha kata kaei kaei kaba ki angel ki tieng, namar katba kidang pynnang pynstad īa ki briew, kidang pynlong ruh īaki ki mrad baehdohnud bad bymsngewthuh (hard hearted and indifferent brutes) jong ka imlang-sahlang. Hato katei ka “ICCES” bakyrkieh lynter bad kitei ki headless philosophers jongka kim la wanrah sha ngi īa kane ka Juk Riewkhlaw bathymmai (Modern Barbarism) kaba pynehdohnud bad kaba pynlong khlemakor (īa ki briew)? Kumta wat hapdeng jong kane ka Khlam bashyrkhei ruh ki buid kti buid kjat ban plie skul noh, khnang ba ka PROJECT EVIL jongki kan dup jop khambun ban īa ka PROJECT GOOD jong u Blei.
Nangta, hato ki bor-skul (kiba dei ki atiar bakhlaiñbor jong katei ka ICCES bakyrkieh lynter) kin lah ban pyntreikam īa ka ‘Social Distancing’ hapoh classroom jongki? Hato ki classroom jongki kilong kum ka pla-jri (flexible rubber duct) kiba lah ban pynheh bad ban pynrit ha kajuh kapor, khnang ban pynngiam lut īa ki khynnah skul baroh ha kawei ka klas na kadaw jong ka Social Distancing ne ka Jingpynīajngai kaba ymdei ban duna īa ka shi mitar iwei na iwei pat? Hato ruh kin lah ban block ne ban khanglad īa kane ka Lyer-Khlam hapoh classroom ne hapoh ki madan īalehkai (playground) jongki? Hato kin pynlong skul hapoh madan wat lada kan slap ne lyer? Lada ki khynnah skul kin īohpang flu ne khieshoh lane baīongkhlieh bad suhkhriat namarba la pynshah (expose) īaki ha u slap bad ha ka lyer, kin leh kumno? Hato kin siew bai dawai, ne hato kin phah īaki sha ki quarantine centre, namarba ki dak ki shin (symptoms) jong ka Khlam COVID-19 ruh kilong kum kitei ki jingpang?

Khyndiat sngi mynshuwa, kumba nga la thoh ha kato kawei pat ka article jongnga, nga la īoh jingtip ba kadon kawei ka skul ha kane ka Jylla kaba la pyrshang ban pynbor īa ki bor District, da kaba thoh shithi sha ki Deputy Commissioner, ba kin ai jingbit īaka ban pynlong skul noh wat hapdeng ba ka ri India bad ka pyrthei hi baroh kawei kidang don hapdeng jong ka Lockdown ban īakhun pyrshah īa ka Khlam Coronavirus. Balei ka leh kyrkieh kumne, hato kadei ka skul jong ka jingbiej ne kadei ka skul jong ka jingstad? Hooid, kadei ka jingshisha ba ngam don kano kano ruh ka jingsngewshun īa katei ka skul bad ngam don hi ruh kano kano ka jingīaithuh-ithaw bad katei ka skul. Kadaw kaba nga la wanrah īa katei ka skul ha ki kotkhubor kalong tang namarba nga don īa ka jingthmu bakyrpang, bad kata kalong ban īakyllur lem ne ban pynpeitmat lang īa kiwei kiwei ki skul baroh. Kumta ngi hap ban kylli īa kine ki jingkylli: Hato ki skul kiba kum kitei ki burom ne em īa ka jingim bakordor jong ki khynnah skul? Hato ki skul kiba kum kitei ki tip ne em īa kato ka jingong kaba ong “Health is Wealth” bad ka mut kumno? Hato kane ka kyntien imsngi ka thew khim jinglong (narrow view) beit tang īa ka jingīoh spah jong ki briew ne ka kham thew īar-jingmut (broad view) īa ka jinglong bakoit bakhiah pura jong ka met bad ka mynsiem jong ki briew shimet-shimet bad jong ka imlang-sahlang baroh kawei (wholesome health of both the individual person and the society as a whole)? Lada ki skul kiba kum kitei ki burom īa ka jingim bakordor jong ki khynnah skul bad ba ki tip ne sngewthuh ruh īa katei ka jingong “Health is Wealth,” balei pat ki mut ban thom īa ka sang jong ka saw ka sian kaba don ha kane ka jingma bakhraw, ka Khlam Coronavirus, da kaba ki kwah ban pynlong skul noh?
Ha u snem 2002, kata 18 snem mynshuwa, lakhie ka khlam SARS (Severe Acute Respiratory Syndrome) hapoh Guangdong province jong ka China kaba la pynīohpang īa palat 8000 ngut ki briew bad kaba la pynīap īa kumba 800 ngut tam naki. Tang katta. Ha u snem 2012 pat, lakhie biang sa kawei ka khlam ha Saudi Arabia īa kaba latip kum ka MERS ne ka Middle East Respiratory Syndrome. Kane ruh kala pynīohpang īa 2,494 ngut ki briew bad kala pynīap 858 ngut ki briew ha katei ka ri. Kane ruh, tang katta. Hadien kumba 2 snem eiei, kata ha u snem 2014-15, kala mih pyrthei biang sa kawei pat ka jait khlam ha Boenda District kaba don hapoh jong ka Democratic Republic of Congo, īa kaba latip kum ka Ebola. Kane ka khlam Ebola kalong kaba kham khlaiñ ban īa kitei artylli haneng namar kala pynīohpang haduh 28,000 ngut tam ki briew ha katei ka ri bad kala pynīap īa kumba 11,000 ngut tam napdeng jongki. Katba kane ka Khlam COVID-19 pat kala sar syndon īa jan baroh kawei ka pyrthei – kala pynīohpang khlam īa kumba 38,22,860 ngut ki briew bad kala shim īa ka jingim jong haduh kumba 2,65,076 ngut ki briew ha ka pyrthei kat haduh mynta (Worldometer data), bad kadang īai bteng ruh ban īaid shaphrang ha kaban pynīohpang bad ban pynīap īa ki briew bad ym pat lah ban ong tip haduh lano kan kut ne īap noh.
Na katei, ngi lah ban sngewthuh ba kane ka Khlam COVID-19 kam dei tang ka khlam rit kaba kum kitei ki khlam ba lajer kyrteng haneng, hynrei kadei ka Khlam rakot (Great Pandemic) kaba bam briew ym tang īa kano kano ka ri hynrei kaba bam briew naphang kat īa kiba lehsting bad kibym biang ha ka jingpynkhreh ban īakhun pyrshah īaka. Kane ka pyni ba ka pyrthei baroh kawei kadang don ha ‘ka saw ka sian’ bajur (grave peril of uncertainty) kabym pat long ban sngewtikna tip kan jia aīu lashibit lashai, ynda haba ka miet basangem kala leit noh bad ka step bapynkthang kala wanphai biang da ka jingtim bathymmai. Wat long kiba ehdohnud ban kheiñtroiñ īa kane ka Khlam Corona kaba mynta namar kadon haka īa ka jinglong kaba sangem bha – nalorba kalong kaba lah ban buhrieh īalade, kalah ruh ban dang khie-im biang bun bunsien wat haba ki briew kila dep koit. Kham pyrkhat khia īa kane, ba ngim lah ban buh īa ka jingim jong ki khun jongngi ha kaei kaei kaba long kum jingkhalai nusib. Namarkata, ngim dei shuh ban pyrkhat shaphang ka jingpynlong skul noh mynta u snem. To tip ba une u snem 2020 udei u snem PANEMIC YEAR ne u snem jong ka Khlam bah. Kumta īa une u snem bamynta baroh uwei ngi dei ban aiti lut noh (totally dedicated) tang ha kaba īakhun tyngeh īa kane ka Khlam Coronavirus. Lada ngi bynnud īa une u snem basniew, ngin sa dang lutksan shuhshuh ha baroh ki liang, naduh ka pisa tyngka jong ka sorkar (government exchequer) haduh ki jingim briew bad kane kan sa pynbabe sah īangi shi jingim. Ka Sorkar kadei ban pyndonkam īa ka bor jongka ban khang noh shisyndon īa baroh ki skul ha kane ka Jylla īamynta u snem!
Ka khlam COVID-19 kumba la ong, kam dei kum kano kano ka jait khlam kaba rit ne tlotbor, kaba ktah tang īa kano kano ka ri ne tang īa kano kano ka kyntoit-ri, īa kaba ngi lah ban kheiñsting. Kane ka Khlam kadei ka khlam bah jong ka Pyrthei salonsar ne ka Global Pandemic. Kumta, lada ngi kheiñsting ne lehshngaiñ, kan thwet kylla biang īangi nadien kum ka dngiem kaba la shah pynthut hano hano, lane, kan wanphai biang sha ngi kumba shad tawiar ka Pyrthei ha u axis jongka, ne kumba wanphai biang ka step ba pynritmynsiem na ka miet badum īongngit kaba lah dep leit. Īamynta hi, ngim pat dei eh ban shu shaniah byrie-shala beit tang ha ki jingong jong ka sorkar ba ngi la jan jop īa kane ka khlam, hynrei ngi dei ban da īohi dalade shuwa bad ba ngin sngewhun ruh īa kata ka jingīohi jongngi, ba kane ka khlam kala dep kut ne duhjait. Ka sorkar ruh kam dei ban sngewpoh (humiliated) da kaba ka pynsngap lang īa ka sur jong u paidbah shuwa ba kan pynmih īa kano kano ka hukum kaba īadei bad ka jingplie noh īa ki skul, kam dei ban pyrshang ban shu ‘dictate’ beit namar ka jingstad bapynseisoh (meritorious insight) bunsien ka ju wan na u paidbah paidlang (ymdei u paidbhur). Īa ki course/syllabus ngi dang lah ban pyndep lano lano ruh; kaba kongsan eh mynta kalong ba ngin īada ne tyngkai (preserve) shuwa īa ka jingim bakordor jong ki khun jongngi namar kidei maki kita ki “Lawei” jong ka ri bad ka Jaitbynriew.
Ki longshuwa jongngi ki ong “Prevention is better than cure,” kaba mut ka jingsumar lypa ka kham bha ban īa ka jingpynkhiah. Mangi ki longmynta pat kiba īohi īa ka jingtriem jong kane ka khlam ngi ong: ‘Protection is better than school,’ kaba mut, ka jingīada ka kham bha ban īa ka jingleit skul. Bad kine baroh artylli kine ki jingong kidei ban īaīaid lang ryngkat-ryngkat ha kine kisngi katba kane ka khlam kam pat kut ne īap, namar ka jingsumar lypa kaba khlem don ka jingīada kam lah ban long kaba pura ha kaban pynīoh īa ka jingshngaiñ ha ki khun jongngi kiba dang leit skul bad kumta, ka jingleit skul kadei ban wan hadien ynda haba kiei kiei baroh kila shngaiñ biang (ban īamih paidbah sha ki lynti bad ki surok). Hynrei na kaei kaba ngi la īohi ha ki kotkhubor, kiba pynsngew synjor mynsiem, la sngewthuh ba ka sorkar ka kwah ban pynlong skul noh ha kine ki bnai ban wan, malumala ha ki bnai June-July. Kane ka jingpyrshang (attempt) kalong kaba ma! Hato ka sorkar ruh ka kwah ban īohi īa ki khun jongngi ba ki īohpang bad īap ha kane ka Khlam? Hato ka sorkar ruh ka sngap tang īa ki jingaijingmut jong kitei ki bor-ICCES bakyrkieh lynter bad ba ka ñiewbeiñ pat īangi ki kmie ki kpa? Hato kito ki kmie ki kpa kiba ha kajuh kapor kidei ki nonghikai skul kim sngewthuh khambha īa kane ka jingma bad īa ki jingeh jingdiaw kiban mih naka? Maki ruh kidei ban pynmynjur īa ka Sorkar Jylla ba, na kadaw jong kane ka Khlam bah Pyrthei, ka jinglong jingman kumba kalong mynta kam pat shah ba ngin plie noh īa ki skul mynta u snem bad ka Sorkar Jylla kadei ban pynmih īa ka hukum kaba long katkum kane ka jingaijingmut.
Ban sot na ka article bamynshuwa: “Ka jingshisha ka sah, ba ki khun jongngi kin ym īap ne kin nym kylla biej noh wat lada yn khang īa ki skul baroh shisnem mynta u snem; hynrei dei ban pynkiew klas beit īaki da kaba pynjari da ka Jingpyrkhat bakham kyrpang na ka bynta īabaroh ki khynnah jong ka skul (Extraordinary General Grace system should be considered). Katba īa ka jingminot jongki pat, khlempep, ngin sa īohi ha ka result jong u snem uban bud ynda haba kila shong ha ka klas kaba kham hajrong – kiba minot te kin pass beit, hynrei kibym minot te kin fail ne sah klas.” Ñiuma, īa Ka batam baduna na kane nga ieh ha ka jingstad jong ka Sorkar ba kan shat kan kheiñ pynbiang. Ha kajuh kapor, ki bor-skul baroh kiba don hapoh jong kane ka Jylla kidei ban klet noh shuwa īa kaban pynlong skul mynta u snem, kum ka jingīaleh baradbah pyrshah īa kane ka Khlam bah!