Klas IV kim nang ban thoh ia ka kyrteng la jong

Shillong, 25 Naitung:
Ki khynnah klas IV kiba pule ha kawei ka skul ha ri Lum Garo la ong ba kim nang tang ban thoh ia ka kyrteng la jong ruh bad la kynnoh ba katei ka dei namar ka jingleh mon ka nonghikai ka bym ju poi thikna sha skul.
Katkum ka jing iathuh ki lad khubor la ong ba ki khynnah klas IV ka skul Manda Apal Primary School kaba don ha East Garo Hills kim nang ban thoh ia ka kyrteng lajong bad la iathuh ba ka Head Teacher jong katei ka skul ka poi hikai tang 20 sngi ha ka shisnem.
La ong ba katei ka jingjia la ka jia mynta la saw snem tam ha kaba ka Derino Momin ka Head Teacher kam ju hikai tista ia ki khynnah skul. KI sengbhalang ha ri Lum Garo ba kynthup ia ka AYWO, ADE bad ka FKJGP ki la dawa ba dei ban weng kam noh shisyndon ia katei ka nonghikai. U Raksrang Sangma u Secretary ka FKJGP u la kynnoh ba katei ka nonghikai ka la ong ba ka sngi balang ka dei ka sngi shuti bad ia kane la pynbna da ka MBOSE, la kynnoh ruh ba kam ai ia ka ja sngi ki khynnah skul naduh u snem 2012.
Kitei ki sengbhalang ki la dawa ba dei ban tohkit ia u President ka School Management Committee (SMC) namar ka jingiadonkti lang bad katei ka nonghikai, ki sengbhalang ki la khyllie ruh ia ka jingiarap ba la poi sha katei ka skul kaba ki la dawa tohkit bad ki la ong ba ka DI ophis na Williamnagar ka la lap ba T..5 lak tyngka la dep ban sei ia ka pisa kaba dei ka Grant ban pynheh ia ki kamra klas na ka T.7 lak tyngka ba la mang. La lap ba na katei ka T.5 lak, la pynieng mynta tang saw tylli ki paia. Ki sengbhalang ki la kynnoh ba ki nongshong shnong ha katei ka shnong ki la ujor pyrshah ia katei ka nonghikai ha ki sngi ba la dep hynrei ym shym leh eiei ia ka.