KJP Synod Sepngi ha ka Balang Nonglang

Nongstoiñ, 19 Rymphang:
Ha kaba iadei bad ka Jingiaseng Samla KJP Synod Sepngi ka ban long ha ka Balang Presbyterian Nonglang, Tynghor Presbytery ka ban sdang naduh ka 24 haduh 26 tarik mynta u bnai, na ka liang jong ka Balang Presbyterian Nonglang ka don ban pyntip sha baroh ki paid riew ngeit khristan kiba thmu ban wan sha katei ka Jingiaseng Synod.
Ka Balang Nonglang ka jngai kumba 130 KM na Shillong bad ka don shaphang shatei na ka surok bah National Highway ban leit sha Riangdo. Ki nongwan jingiaseng kiba mih na lynti Shillong kim don kam shuh ban iaid lyngba ka sor Nongstoin, hynrei kin lad noh na Sohpian Bye Pass.
Ha kaba iadei pat bad ki lad ban rung sha ka shnong Nonglang ki don ar tylli ki lad na ka surok bah Nongstoin-Riangdo, kawei na Riwiang bad kawei Pat na ka shnong Seinduli, na Riwiang sha Nonglang ka jngai kumba 16 KM bad lah ban iaid da baroh ki jait Kali katba na Seinduli sha Nonglang pat ka jngai kumba 11KM tangba lah ban iaid tang ki Sumo, Pick-Up bad ki Kali ba don four wheel bad yn buh ruh da ki banner ha kitei ki lad.
Na ka liang jong u Rev. KG Snaitang Pastor In charge ka Balang Presbyterian Nonglang ha ka kyrwoh khubor u la pyntip ruh sha baroh ki paid riew ngeit khristan kiba thmu ban wan sha katei ka Jingiaseng khamtam ia ki Delegate ba shnong Nonglang ka long kaba khriat bad ki paidbah kidei ban pynbiang ia la ki jingdonkam.
Shuh shuh u la pyntip ruh ba ha ka Jingiaseng ka ban long ha ka sngi u Trai kata ha ka 26 tarik ki Nongkren ki long ha kapor 10:30 AM Rev. R.R. Rapsang, 1:30 PM Rev. H.K. Nongbsap bad ha kapor 6:30 PM Rev. L.C. Thangkhiew.