KJP Assembly ha Mawphlang

Shillong, 8 Iaiong:
Ka jingiaseng ka Khasi Jaintia Presbyterian Assembly kaba Hynniew kan long ha ka Balang Presbyterian Mawphlang, Mawphlang Presbytery, KJP Synod (Sepngi) naduh ka 9 haduh 12 tarik mynta u bnai, ka jingia seng paidbah ha ka sngi u Blei kan long ha madan Lum Mawsing,Madan Lyngktop,markhap bad ka Lawkyntang , Mawphlang bad ka Khasi Heritage Village jong ka KHADC.
Ki Nongkren ki long u Rev.G.S.Lyttan na ka KJP Synod (Mihngi) h aka por 10 baje mynstep bad ha ka por 1:30 baje nohsngi u Rev L.S. Nongphlang na ka Ri Bhoi Synod. Ki don ruh ki kwaiar ki ban rwai na ki Balang bapher bapher na ki Presbytery jong ka KJP Synod (Mihngi) bad na ka BJP Synod (Sepngi) ha katei ka Jingiaseng.
Ki jaka pynieng kali ha katei ka Jingiaseng ha ka 12 tarik kin long ha Madan Lyngktop syndah bad ha jaka long Jingiaseng Paidbah bad kumjuh ha ki madan sawdong jong ka Shnong Mawphlang kiba iajan bad katei ka jaka long Jingiaseng. La pynbeit ruh ba ki kali heh kiba wan na ki thain Mawkyrwat bad Mawsynram kin ieng ha ki rud surok Dymmiew Blah (Wah Rina)kaba jngai tang kumba shiteng kilomitar eiei katba ki kali rit kin rung beit sha ki parking syndah ka jaka long Jingiaseng.
Na ka bynta ki kali heh kiba wan na ki thain Mawngap shaneng,yn ialeh ban pynrung sha ki parking syndah ka jaka long Jingiaseng bad ha Madan Tataw,kaba jngai tang kumba shi kilomitar tam eiei, katba ia ki kali rit yn pynrung sha ki parking ha syndah ka jaka long Jingiaseng. Kumba la ioh jingbthah na ka KJP Assembly,na ka liang jong ka Balang,la pynbeit ba yn ym shah iano iano ban die mar khutia khutain, ki kot ki cassette bad kiwei kiwei ha ki lynti bad ha ki jaka long Jingiaseng, namar ba ki surok kali kiba leit sha ka jaka long Jingiaseng ki kham rit, la pynbeit ruh ba ki kali kiba rung sha ki jaka parking kin ia leh ban mih tad ynda la wai ka Jingiaseng bad ban kohnguh ia ki jingbthah jong ki Traffic Police bad ki Traffic Volunteer ba la pynbeit da ka Balang khnang ban lait na ka jingdheng kai. Ka Balang ka wer bad khot sngewbha ia baroh ban ia poi lang sha katei ka Jingiaseng ba shisien arsnem na ka bynta ban pynkhraw ia ka Burom ka jong U Blei, ong ka kyrwoh na u tymmen basan M.S.Kharshiiing, Secretary-Balang Presbyterian Mawphlang.