“Kiwei ki riewlum ki donkam laisen khaii”

Shillong,22 Naitung:
U EM ka tnad khaii pateng, ka KHADC u bah Latiplang Kharko ngor ha ka jingiakren bad ki nongthohkhubor mynta ka sngi, u la ong ba ki la don haduh 44 tylli ki Riewlum ha kane ka jylla kiba don hapoh ka Tribal List jong ka Sixth Schedule, u la ong ba kitei baroh 44 tylli ki ioh ia ka Schedule Tribe kum ba ki ioh ki Khasi, hynrei u bah Latiplang u la ong ba naduh u snem 2011, la mynjur ia ka Amendment Bill ba tang ki Riewlum kiba dei na ki District ka jylla, kim donkam ia ka Trading License, lait nangta ba roh kiwei pat ki riewlum ki donkam ban ioh ia ka Trading License lada ki kwah ban leh ia ki kam khaii pateng hapoh u pud u sam ba dei peit ka Khasi Hills Autonomous District Council.
U bah Latiplang u la ong ba tang ki Khasi, Jaintia bad Garo ki bym donkam ia ka Trading License katkum katei ka ain kaba la dep ban pynkylla ha u 2011. Kumba ka long mynta la iohi ba ki la don bun kiwei pat ki riewlum kiba na kiwei pat ki jaitbynriew kum ki Naga , ki Mizo ki Hmar kiba leh ia ki kam khaii jong ki hangne ha nongbah Shillong khlem ki Trading License , ha kaba ia dei bad katei na ka liang u EM Incharge ka Trade u la ong ba ka KHADC kan ym pyllait ia kitei ruh hynrei shen kan sa leit ban khang tala noh ia ki dukan bad ki jingdie jong ki.