Kiwei ki nang leit iaseng; u nongtuh, u nang swait ban pynpait kali

Shillong:Ka Shillong Cathedral Parish, Laitumkhrah ka la kyntu ïa ki riewngeit kiba leit jingïaseng ba kin long kiba phikir bha ïa la ki jong ki kali ba ki pynïeng ha ki jaka pynïeng (Parking Lot) namar ka jingdon ki nongtuh kiba kyndang kali ban tuh ïa ki tiar ki tar.

Ha ka video CCTV ba la pyllait da ki bor khmih ka Parish, la ïohi ba uwei u briew bym lah ban ithuh ula ïaid swait ïa kiba bun ki kali ba pynïeng ha ka jaka pynïeng kali jong ka Parish ha ka por ba long ha Holy Mass mynha ka sngi U Blei.

Kane ka video ka pyni ïa u briew uba pyrshang ban kyndang ïa ki kali.
Katkum ka khubor, une u juh u briew u dei uba ju wan man la ka sngi U Blei ha ka por ba long Jingïaseng ka Mass Bakhuid. Ïa kane ka video la pynsaphriang online ban pyni ïa ki paidbah bad ban kyntu ba kin phikir ïa la ki kali namar kiba don bun ki jingjia ba shah kyndang ki kali ha kane ka jaka pynïeng kali ka Parish.

Hadien ba shong bishar ïa kane ka video, ki bor khmih ka Parish ki la ujor da ka ejahar sha ka Laitumkhrah Police Station pyrshah ïa une u briew bym lah ban ithuh.

Ki Pulit ki la pynlong ïa ka jingtohkit ban lah pynithuh bad ban kem ïa une u briew.