Kito kiba dei ban ia mareh kam pulit, lada ki don eksamin, ki hap ban pyntip mardor

Shillong: Ka Central Recruitment Board (CRB) Meghalaya Police, ka pyntip, ba ki katto katne ki skulbah ki lah ban iatyngkhuh bad ki tarik ba la buh ban leh ia ka physical Efficiency Test (PET) bad halor kane, la bthah ia baroh ki kandidet kiba iakynduh jingeh ha ka por eksamin jong ki bad ki tarik (PET) ba kin leit sha u nongpeit ia ka (PET) Centre ha kaba la buh kyrpang ia ki ban leh ia ka (PET) bad ban aiti ia ka aplikeshon katkum ka jingbthah jong ka Central Recruitment Board (CRB) ryngkat bad ki kot ki sla kiba kynthup ia ka kopi Xerox jong ka kot pdiang (PET) jong ka jingthew ia ka jinglah jong ka met, ka Xerox kopi jong ka admit card na ka bynta ka kolej board jong ka skulbah kaba iadei, ka Xerox copy jong ka por thoh eksamin ba la pynmih da ka skulbah/board/kolej.

Hadien ba la pdiang ia ka aplikeshon, ka (CRB) jong ka tnad thung kam jong ka sorkar pdeng kan ai ia ka tarik bad ka jaka test (PET) kaba pher katkum ka jingsuk jong ka tnad thung kam jong ka tnad treikam jong ka sorkar pdeng bad la ong, ba katei ka jingkylla tarik, yn pdiang tang shisien, tangba ka jingkyrpad ka long katkum ki daw kiba biang. Ki jingkyrpad na ka bynta ki jingkylla bunsien ha ka tarik jong ka (PET) jong ka jingthew ia ka jinglah jong ka met yn nym pdiang. Ka tarik ba khatduh ban pdiang ia ka aplikeshon ban pynkylla ia ka tarik bad ka jaka (PET) kan long ha ka 18 tarik u Naiwieng,2024.

Na ka bynta ki jingtip ba kham bniah bad jingpynshai ha kaba iadei bad ka Admit card, physical Efficiency Test (PET) date bad kiwei kiwei, la bthah ia ki kandidet ba kin phone sha u no.6033164273 jong ka Central Recruitment Board CRB office helpline ha ka por treikam ha ki sngi trei.