Shillong:U myntri ka tnad pule puthi ka jylla u Rakkam A Sangma u la pynpaw ia ka jingbym sngew iahap ia kito kiba sngew khohnioh ia ka jingbuh ia ka dur u Myntri Rangbah u Conrad K Sangma ha ka kot iarap ia kiba ialeh Matrik ne SSLC kaba ai kyrteng ka ‘CM Impact, A Guide Book For SSLC Examination 2025’, bad ula ong ba kane ka dei ka rukom pyrkhat ki briew ka bym iahap satia.
Haba pynrem ia kito ki wohdaw ia ka jingbuh ia ka dur u myntri rangbah u Conrad ha kane ka kot, u Rakkam u la ong ba kito ki bym sngew sarong bad ki bym kwah ban peit ne iohi ia ka dur u Myntri Rangbah, sop noh ia ka dur tangba wat sop ia ki jingthoh kiba don hapoh. U la ong ruh wat peit ia ka jingsop najrong ka kot, hynrei peit ia ki jingthoh kiba don shapoh.
U Rakkam u la ong ba kane ka dei ka kot iarap ia ki khynnah kiba pule ia ka klas X khnang ban pynbha ba kin lah ban pass kham bha ha ka eksamin SSLC khamtam sha ki jaka nongkyndong, kiba shem jingeh ban iakhun bad ki khynnah pule kiba na sor.
Lah ban kdew ba ki seng sain pyrthei kum ka VPP, ka Congress bad ki riew paidbah kim sngew iahap ia ka jingbuh dur u Myntri Rangbah ha ka kot iarap kaba la pynmih ka sorkar na bynta ki klas X bad kila kam ba ka dei ka buit tang ban khring ia ki paidbah khamtam ia ki samla pule kiba dang lung ka jabieng.
Phi don ban ong eiei?